Luka 4 - Tedim Bible

Zeisu A Kikheemna

¹ Zeisu in Kha Siangtho tawh kidimin Jordan gun pan a ciah ciangin, Kha Siangtho in gampa lakah paipih a,

² ni sawmli tawntung dawimangpa in a kheem hi. Tua hun sung khempeuh Zeisu in an ne lo a, a ni a cin’ ciangin a gil kial hi.

³ Dawimangpa in, “Nang in Pasian’ Tapa na hih takpi leh, hih suang khomun suaksak in,” a ci hi.

⁴ Zeisu in, “Mite in khomun bek tawh nungta lo hi, ci-in Lai Siangtho sungah kigelh hi,” a ci hi.

⁵ Tua lai takin dawimangpa in Zeisu paipihto a, leitung gam khempeuh neukha sungin a lak hi.

⁶ “Hih vangliatnate leh amau minthan’nate kong pia ding hi. Bang hang hiam na cih leh, kei hong kipia zo a, ka piak nop mi kiangah ka pia thei hi.

⁷ Tua ahih ciangin, hong bia leteh hihte khempeuh nangma aa ahi ding hi,” a ci hi.

⁸ Zeisu in zong, “Na Topa Pasian na bia ding hi. Ama na bek na sem ding hi, ci-in Lai Siangtho sungah kigelh hi,” a ci hi.

⁹ Tua khit ciangin, dawimangpa in Zeisu Jerusalem khuapi sungah paipihin, biakna innpi khum zangah a koih khit ciangin, “Nang in Pasian’ Tapa na hih takpi leh, na pumpi kikiasuk sak in.

¹⁰ Bang hang hiam na cih leh: ‘Amah in ama vantungmite nang ading thu a pia ding hi,’ leh

¹¹ ‘Na khe in suang tawh a kisuk khak loh nadingin, Amau in khut tawh nang hong dom ding uh hi,’ ci-in Lai Siangtho sungah kigelh hi,” a ci hi.

¹² Zeisu in, “Na Topa Pasian na ze-et kei in,’ a kici hi,” a ci hi.

¹³ Dawimangpa in kheemna a vekpi-in ahih khit ciangin a kiang panin tomkha sung a paikhia hi.

Galile ah Zeisu’n Nasep Kipan

¹⁴ Zeisu in Kha Siangtho’ vangliatna tawh, Galile gamah ciahkik hi. Ama thu a kimkot gam khempeuh ah kizeelin a thang hi.

¹⁵ Amaute kikhopna innah thu hilh a, mi khempeuh in amah a phat uh hi.

Nazareth ah Zeisu Kisang Lo

¹⁶ A khan’na Nazareth khua-ah Zeisu pai a, ngeina bangin Nipi ni-in kikhopna innah lut a, Lai Siangtho sim dingin a ding hi.

¹⁷ Kamsangpa Isaiah’ Lai Siangtho a kipiak ciangin phen a:

¹⁸ “Topa’ Kha Siangtho in keima tungah a om hi. Bang hang hiam i cih leh, mizawngte kiangah Lungdamna Thu zasak dingin hong sawl zo hi. A kiman a kikhum mite a kikhah nading ahi zongin, Mittawte in khua a muh kik theih nading ahi zongin, Bawlsiatna a thuak mite khah nading ahi zongin,

¹⁹ Topa’ hehpihna kum ahi, ci-in zaksak nading ahi zongin, Kei hong sawl zo hi,” ci-in kigelhna mun a mu hi.

²⁰ Lai Siangtho zial a, kikhopna inn nasempa a piak khit ciangin a tu hi. Kikhopna inn sungah a om mi khempeuh in tel takpi-in a en uh hi.

²¹ Zeisu in, “Tuni-in hih Lai Siangtho thu in note zak dingin tangtung zo hi,” a ci hi.

²² Mi khempeuhte in Zeisu thu mang uh a, ama kam sung pan a paikhia lungsim phawn’sakna thu, lamdang a sa uh a, “Hih pa in Josef tapa hilo ahi hiam?” a ci uh hi.

²³ Zeisu in, “A tel takpi-in note in, ‘Zatopa aw, nangmahmah na kidamsak in. Kapernaum khua-ah na bawlna khempeuh kote in ka zak bangun, nangma gamah zong bawl in,’ ci-in thugentehna tawh kei kiangah nong ci ding uh hi.

²⁴ Ke’n aman takpi kong cih-inah, kamsang kuamah peuhmah ama gamah mite in a deih kei uh hi.

²⁵ Ahih hangin ke’n aman takpi kong cih-inah, Elijah khan’ lai-in kum thum leh kha guk tawntung guahtui kang a, gam sung khempeuh ah kial a tun’ lai takin, Israel mipawlte lakah meigong tampi a om uh hi.

²⁶ Tua meigong khat beek kiangah Elijah a sawl kei hi. Sidon gam Zarephat khua a, meigong khat kiang bekah a sawl hi.

²⁷ Kamsang Elisha a khan’ lai takin, Israel mipawlte lakah miphak tampi a om uh hi. Ahih hangin Siriapa Na-aman longal kuamah in damna a ngah kei uh hi,” ci-in a gen hi.

²⁸ Kikhopna innah a om mi khempeuh in tua a zak uh ciangin, a heh mahmah uh hi.

²⁹ Amaute ding-in Zeisu khua nawlah a hawlkhiat khit uh ciangin, khua omna mual dawn kui-ah bungbu sawnkhiat dingin a paipih uh hi.

³⁰ Ahih hangin Zeisu in amaute lai zang pan paikhia-in a pai mang hi.

Dawinin Vei Mi Khat

³¹ Zeisu Galile gam Kapernaum khua-ah a paisuk khit ciangin, Nipi ni-in thu a hilh hi.

³² Amaute in ama thuhilhna lamdang a sa uh hi. Bang hang hiam i cih leh, amah in ukpa bangin thu a hilh hi.

³³ Tua kikhopna inn sungah kihhuai dawi kha a lut mi khat a om hi.

³⁴ Amah in, “Nazareth mi Zeisu aw, kote in nang tawh bang kikum i hi hiam? Kote susia dingin hong pai na hi hiam? Nang kua mi na hih ke’n kong thei hi. Pasian’ misiangtho na hi hi,” ci-in aw lianpi tawh a kiko hi.

³⁵ Zeisu in, “Pau kei in la, ama sung pan paikhia in,” ci-in a taai hi. Dawi in amaute lai zangah amah a puksak khit ciangin, natna bawl loin ama sung pan a paikhia hi.

³⁶ Mi khempeuh in lamdang a sa uh a, “Hih thu in bang thu ahi hiam? Thu tawh, vangliatna tawh, kihhuai dawite thu a piak ciangin amau a paikhia uh hi,” ci-in khat leh khat a kikum uh hi.

³⁷ Ama thu in a kimkot mun khempeuh ah a thang hi.

Zeisu in Piter’ Sungnu Damsak

³⁸ Zeisu in kikhopna inn pan a paikhiat khit ciangin Simon’ innah a lut hi. Simon’ sungnu in nakpi-in nattun’ a, a dam nading Zeisu kiangah a thuum uh hi.

³⁹ Zeisu in ama kiangah ding-in cinatna a taai khit ciangin, a nattun’ dam a, thakhatin thoin zinte a vak hi.

Zeisu In Nitakin Tampi Damsak

⁴⁰ Ni a tum ciangin, cinatna pawlpawl a neite khempeuh Zeisu kiangah hong paipih uh a, amah in amaute khempeuh tungah khut nga-in a damsak hi.

⁴¹ Dawite in zong, “Nang in Pasian’ Tapa na hi hi,” ci-in kikoin mi tampite sung pan a paikhia uh hi. Amah in Khazih ahih lam a theih manun, Amah in amaute taii-in kam khat beek a pausak kei hi.

Thuhilh Khualzinin Zeisu Paikhia

⁴² Khua a vak ciangin Zeisu paikhia a, gampa lakah a pai hi. Mihonpite in zong uh a, a kiang a tun’ uh ciangin, amaute kiang pan a paikhiat loh nadingin a kho nuam uh hi.

⁴³ Ahih hangin Zeisu in, “Pasian Gam’ Lungdamna Thu khua dangah zong ka hilh ding hi. Bang hang hiam na cih uh leh, tua bang deihna-in kei hong sawl hi,” a ci hi.

⁴⁴ Tua lai takin Zeisu in Galile gam kikhopna innte ah thu hilhin a om hi.