Luka 3 - Tedim Bible

Baptaiz Johan’ Thuhilhna

¹ Kaisar kumpipa Tiberias a man’ zawh kum sawm leh kum nga ciangin, Judah gamah Pontias Pilat mangpi hi a, Galile gamah Herod menzi hi a, Iturea gam leh Trakhonis gamah Herod’ nau Filip menzi hi a, Abilene gamah Lisanias menzi hi a;

² Annas leh Kaiafas in siampi ukte ahih lai takin, khamtung a, om Zekhariah’ tapa Johan tungah Pasian thu a tung hi.

³ Kamsangpa Isaiah’ Lai Siangtho sungah a kigelh mah bangin Johan in Jordan gun dungah vak kawikawi a, mawhna maisak nading kisik kikna tawh kituakin baptaizna thu a hilh hi.

⁴ Isaiah gelhna in: “Gampa lakah kikopa’ aw in, ‘Topa paina lam na sial un. Ama lampi na tangsak un.

⁵ Mualkuam thuk khempeuh kivuk dim ding a, Mual lian leh mual neu khempeuh kito niam ding a, Lam kawi khempeuh kitangsak ding hi, Lei hamte a kinelsak ding hi;’

⁶ Mi khempeuh in Pasian’ gupna thu a thei ding uh hi,” ci-in a gelh hi.

⁷ Tua lai takin Johan in ama khut tungah kibaptaiz dingin hong pai mihonpite kiangah, “No mualtan’ suante aw, a hong tung ding hehna pan na taikhiat nadingun kua in hong hilhkhol hiam?

⁸ Tua ahih ciangin kisikkikna tawh kilawm gah na gah un. ‘Abraham ka pa uh hi,’ ci-in na lungsim sung uh ah lungngaih ding na kipan kei un. Ke’n kong cih-inah, Pasian in hih suangte nangawn zong Abraham’ tate a suaksak thei hi.

⁹ Tu-in zong sing phungah hei a om zo hi. A gah hoih gah lo kung khempeuh phuk pai-in mei sungah kikhul ding hi,” a ci hi.

¹⁰ Mihonpite in, “Tua bang ahih leh, kote in bang ci hih ding ka hi uh hiam?” ci-in a dot uh ciangin,

¹¹ Johan in, “Puan ak nih a neite in puan ak nei lote tawh hawm ta hen. An nek ding a neite in zong tua bangin hih ta hen,” a ci hi.

¹² Siahdongte in zong kibaptaiz dingin hong pai uh a, “Sia aw, kote in bang ci hih ding ka hi uh hiam?” ci-in a dot uh ciangin,

¹³ Johan in, “Note in thu hong kipia zah khengin dong kei un,” a ci hi.

¹⁴ Galkapte in zong, “Kote in zong bang ci hih ding ka hi uh hiam?” ci-in a dot uh ciangin Johan in, “Note in kuama kiangah zawhthawhna tawh la kei un la, midangte zuau thu tawh na mawhsak kei un. Na khasum ngah zah uh tawh lungkim un,” ci-in a gen hi.

¹⁵ Mi khempeuh in Johan in Khazih ahi kha ding hiam ci-in, lamenin a lungsim sung uh ah a lungngai uh hi.

¹⁶ Johan in, “Note tui sungah ka hong baptaiz hi. Kei sangin a lian zaw pa khat hong pai ding hi. Ama khedap khau sut dingin zong ka kilawm kei hi. Tua pa in Kha Siangtho leh mei sungah note hong baptaiz ding hi.

¹⁷ Ama buh phual a zapsiang nadingin a khutin lawhpi a tawi hi. A tak teng a sal sungah koih ding hi. A site ahih leh, mit ngeilo mei-in hal ding hi,” ci-in a hilh hi.

¹⁸ Tua bangin Johan in hansuahna tawh Lungdamna Thu mite kiangah a hilh hi.

¹⁹ Ahih hangin, menzipa in a nau’ zi Herodias leh ama mawhna teng hangin Johan in taai ahih ciangin,

²⁰ Herod in ama mawhna khempeuh tungah hih mawhna behlapin, Johan thong sungah a khia hi.

Zeisu A kibaptaizna

²¹ Mi khempeuh a kibaptaiz khit uh a ciangin, Zeisu in zong kibaptaiz a, thu a nget lai takin van kihong a,

²² Kha Siangtho pum nei-in vakhu bangin ama tungah kumsuk a, “Nangmah in ka lung hong damsak ka it, ka Tapa na hi hi,” ci-in vantung panin aw khat a ging hi.

Zeisu’ Khang Thu

²³ Zeisu in thuhilh a kipat ciangin kum sawmthum bang a pha hi. Mite upna bangin Zeisu in Josef ta ahi hi. Josef in Heli’ ta hi,

²⁴ Heli in Matthat’ ta hi, Matthat in Levi’ ta hi, Levi in Melkhi’ ta hi, Melkhi in Jannai’ ta hi, Jannai in Josef ta hi.

²⁵ Josef in Mattathias’ ta hi, Mattathias in Amos’ ta hi, Amos in Nahum' ta hi, Nahum in Esli’ ta hi, Esli in Naggai’ ta hi,

²⁶ Naggai in Maath’ ta hi, Maath in Mattathias’ ta hi, Mattathias in Semein’ ta hi, Semein in Josek’ ta hi,

²⁷ Josek in Joda’ ta hi, Joda in Joanan’ ta hi, Joanan in Resa’ ta hi, Resa in Zerubbabel’ ta hi, Zerubbabel in Shealtiel’ ta hi, Shealtiel in Neri’ ta hi,

²⁸ Neri in Melkhi’ ta hi, Melkhi in Addi’ ta hi, Addi in Kosam’ ta hi, Kosam in Elmadam’ ta hi,

²⁹ Elmadam in Er’ ta hi, Er in Joshua’ ta hi, Joshua in Eliizer’ ta hi, Eliezer in Jorim’ ta hi, Jorim in Matthat’ ta hi, Matthat in Levi’ ta hi,

³⁰ Levi in Simeon’ ta hi, Simeon in Judah’ ta hi, Judah in Jonam’ ta hi,

³¹ Jonam in Eliakim’ ta hi, Eliakim in Melea’ ta hi, Melea in Menna’ ta hi, Menna in Mattatha’ ta hi, Mattatha in Nathan’ ta hi, Nathan in David’ ta hi,

³² David in Jessi’ ta hi, Jessi in Obed’ ta hi. Obed in Boaz’ ta hi, Boaz in Shelah’ ta hi. Shelah in Nahshon’ ta hi, Nahshon in Amminadab’ ta hi,

³³ Amminadab in Admin’ ta hi, Admin in Arni’ ta hi, Arni in Hezron’ ta hi. Hezron in Perez’ ta hi, Perez in Judah’ ta hi,

³⁴ Judah in Jakob’ ta hi, Jakob in Issak’ ta hi, Issak in Abraham’ ta hi, Abraham in Terah’ ta hi, Terah in Nahor’ ta hi,

³⁵ Nahor in Serug ta hi, Serug in Reu’ ta hi, Reu in Peleg’ ta hi, Peleg in Ebar’ ta hi, Ebar in Shelah’ ta hi,

³⁶ Shelah in Kainan’ ta hi, Kainan in Arfasat’ ta hi, Arfasat in Shem’ ta hi, Shem in Noah’ ta hi, Noah in Lamek’ ta hi,

³⁷ Lamek in Methuselah’ ta hi, Methuselah in Enok’ ta hi, Enok in Jared’ ta hi, Jared in Mahalate-el’ ta hi, Mahalale-el in Kainan’ ta hi,

³⁸ Kainan in Enos’ ta hi, Enos in Seth’ ta hi, Seth in Adam’ ta hi, Adam in Pasian’ ta hi.