Late 99 - Tedim Bible

Siangtho Pasian Phatna

¹ Topa in uk hi; mihonte ling hen! Amah, Kherubte tungah tu hi; leitung liing ta hen!

² Zion khuapi-ah Topa lian hi; amah in leitung mi khempeuh uk hi.

³ A lian a kihtak-huai ama min, mi khempeuh in phat ta hen. Amah siangtho hi.

⁴ Thutang a deih, Vanglian Kumpipa aw, nangmah in thuman na phut khin a, Jakob’ sungah thutang leh thuman na semkhia hi.

⁵ I Topa Pasian phat un; ama khe ngakna munah bia un! Amah siangtho hi!

⁶ Moses leh Aaronte in ama siampi hi uh a, amah a biate lakah Samuel zong kihel hi. Topa tungah amaute kiko uh a, amah in amaute a dawng hi.

⁷ Amah in meii khuampi sung pan amaute tungah thu gen a, ama teci pan’nate leh amah in amau tunga a thukham piakte amaute in zui uh hi.

⁸ Kote’ Topa Pasian aw, nangmah in amaute na dawng hi; nangmah in amaute tungah mawhna a maisak Pasian na hi a, ahih hangin amau gamtat khialhnate a thukkik khat na hi hi.

⁹ Topa Pasian phat un la, ama mual siangtho-ah bia un; bang hang hiam cih leh i Topa Pasian siangtho hi!