Late 98 - Tedim Bible

Ama Thumanna hangin Pasian Phat Ding

¹ Amah in nalamdangte bawl khin ahih manin Topa tungah la thak khat sa un! Ama khut taklam leh ama khut siangthote in amah gualzosak hi.

² Topa in ama gupkhiatna kitheisak khin zo a, amah in minamte muhna-ah ama thumanna lang sak khin hi.

³ Amah thutakin, it tawntungna nei ahih manin Israelte' tunga a thuciamna tung sak hi. Leitung mi khempeuh in i Pasian’ gupkhiatna mu khin uh hi.

⁴ Leitung mi khempeuh aw, Topa tungah lungdamin la sa un la, lungdamin awng khia un la phatna la sa un!

⁵ Laiza lasakna tawh Topa tungah phatna late sa un la, laiza lasakna leh langaih tawh phat un!

⁶ Pengkulte leh sa-ki aw tawh Topa, Kumpipa mai-ah lungdamna ging sak un!

⁷ Tuipi leh a sunga omte khempeuh aw, awng un la, leitung leh a tunga teeng khempeuh aw, la sa un.

^8-9 Gunte aw, na khut uh beeng un. Mualte aw, Topa mai-ah lungdamin la sa un. Bang hang hiam cih leh leitung a uk dingin amah hong pai ta a, thumanna tawh leitung mite’ thu ahi bangin hong khen ding hi.