Late 96 - Tedim Bible

Pasian pen, Minam Khempeuh’ Phat Ding

¹ Leitung mi khempeuh aw, Topa tungah la thak khat sa un; Topa tungah la sa un!

² Topa tungah la sa un la, ama min phat un; ni khat khit ni khat ama hong hotkhiatna thu gen tawntung un.

³ Ama minthan’na, minamte lakah gen un la, ama nalamdang septe, mi khempeuh lakah pulak un!

⁴ Bang hang hiam cih leh Topa lian a, nakpi tak-a phat ding ahi hi; pasian dangte khempeuh sangin amah zahtak zawk ding ahi hi.

⁵ Bang hang hiam cih leh minam dangte’ pasiante khempeuh in milim hi lel a, ahih hangin Topa ahih leh vantungte a bawlpa ahi hi.

⁶ Pahtawina leh liatnate ama mai-ah om a, hatna leh hoihnate ama omna mun siangtho-ah a om hi.

⁷ Minam kimte aw, Topa in minthan’na leh hatna nei hi, ci-in mang un, Topa in nei hi, ci-in mang un.

⁸ Ama min in a ngah dinga kilawm minthan’na, Topa tungah pia un la, biak piakna hong keng-in ama huang sungah hong pai un!

⁹ Puan siangtho silhin Topa bia un. Leitung mi khempeuh aw, ama mai-ah ling un!

¹⁰ Minamte lakah, “Topa in uk hi! Hi hi, leitung kikipsak a, liing ngei lo ding hi; amah in mihingte’ thu a manin khen ding hi,” ci un.

¹¹ Vantungmite kipak hen la, leitung lungdam hen; tuipi leh a sunga omte khempeuh awng ta uh hen;

^12-13 lo lai leh a sunga om khempeuh nuamin diang uh hen! Tua ciangin gamlak-a sing om khempeuh in Topa’ mai-ah lungdamin la sa hi, bang hang hiam cih leh amah hong pai ta hi, leitung mite thu khen dingin hong pai ta hi. Amah in thumanna tawh leitung uk-in, mite’ thu ahi bangin khen ding hi.