Late 95 - Tedim Bible

Pasian Phatna: Thumang lote Hilhkholhna

¹ Hong pai un, Topa phat ni; eite a hong hu, a hong honkhia pa tungah lungdamna la sa ni.

² Ama omna-ah lungdamna ko-in pai ni; phatna late, ama tungah lungdam takin sa ni!

³ Bang hang hiam cih leh Topa in a lian Pasian khat hi a, pasian khempeuh tungah Kumpi lian khat ahi hi.

⁴ Amah in leitung khempeuh uk a, guam thukpen panin mual sangpen dawn dongin amah in uk hi.

⁵ Amah in a bawlsa tuipite uk a, ama bawlsa leitung zong uk hi.

⁶ Hong pai un, bia-in kun ni, eite hong Bawl Topa mai-ah khukdin’ ni!

⁷ Bang hang hiam cih leh amah in eite’ Pasian hi a, eite in ama hong kep mite leh ama khut sunga om tuute i hi hi. Tu ni-in hih bangin ama hong thugen za un:

^8-9 Amaute in ka nasepna mu khin napi, Meribah leh Massah mun-ah na pate un kei hong ze-etin, gamtatna tawh ka lah ding hong kalh hun lai bangin, note in na lungsim uh khauhsak kei un.

¹⁰ Kum sawmli sung tua minam ka kih a, “Amaute in a lungsim sungah a khial mi hi a, amaute in ka thupiakte mang lo uh hi,” ka ci hi.

¹¹ Tua ahih ciangin ka nopsakna mun-ah amaute a lut lo dingin sinso kawmin ka kiciam hi.