Late 9 - Tedim Bible

Pasian’ Thukhenna Thumante

¹ Ka lungsim khempeuh tawh Topa tungah lungdamna kong pia ding hi; na bawlna a lamdangte khempeuh ka gen ding hi.

² Lungdamin nangma sungah nuamin ka diang ding a, min phatna la ka sa ding hi, Sangpen Pa aw.

³ Ka galte a nungkik ciangin, nangma mai-ah amaute pukin kisia uh hi.

⁴ Bang hang hiam cih leh, keima thutan’na nong kipsak a, tokhom tungah tu-in thuman na khen hi.

⁵ Minamte na tai a, migilote na susia hi; a tawntunga mangthang dingin amau min na phiat hi.

⁶ Siat denna sungah galte beimang hi; a khuate uh na zunglot hi; amau kiphawk kha nawn lo hi.

⁷ Topa ahih leh kumpi za-in tu ngitnget a, thukhen nadingin a tokhom a bawl hi.

⁸ leitung mite’ thu a manin khen a, a kilawm bangin mite’ thu khen hi.

⁹ Topa in, nen’niamna a thuakte’ adingin munkip hi a, haksat hun ciangin mun muan’huai ahi hi.

¹⁰ Topa aw, nangmah hong zongte nusia lo na hih manin, na min a theite in nang hong muang hi.

¹¹ Zion-a om Topa phatna la sa un! Ama nasepnate mite lakah gen un!

¹² Bang hang hiam cih leh mi thahna a hua-pa in amaute phawk a, a thuak mite’ aw mangngilh lo hi.

¹³ Ka tungah hong dik in, Topa! Sihna panin hong honkhiapa aw, kei hong mudahte tung pan ka thuakna hong en in la,

¹⁴ nangmah phatnate phawk kikkik-in, Zion tanute huang sungah nong hotna hangin ka nuam ding hi.

¹⁵ Amau bawlsa gum sungah minamte kiasuk uh a, a ngenthang siahna sung uh-ah amau khe mah a awk hi.

¹⁶ Topa in thu hong khen-in, migilote amau khut nasepna mah-ah awksakna tawh amah hong kilang hi.

¹⁷ Pasian a mangngilh minam khempeuh ahi migilote in Leinuai ah pai ding uh hi.

¹⁸ Bang hang hiam cih leh mi cimawhte kimangngilh den lo ding a, mizawngte’ lametna bei paisuak lo ding hi.

¹⁹ Tho in, Topa! Mi, kizosak ke’n; na mai-ah minamte thu khen in!

²⁰ Amaute lau sak in, Topa! Mi ahih lelna uh minamte theisak in!