Late 85 - Tedim Bible

Pasian’ Hehpih ding Ngetna leh Amah Muan’na

¹ Topa aw, nangma gam, na lungsim tawh kituak hi; Jakob’ nopsaknate a ngeina na bangsak kik hi.

² Na mite’ mawhna na maisak a, amau khialhna khempeuh na maisak hi.

³ Na hehna khempeuh na damsak a, na sin so-na na daisak hi.

⁴ Kote’ kihotkhiatna Pasian aw, kote ka ngei uh hong bangsak kik in la, kote tunga na lungkim lohna beisak ta in!

⁵ Kote tungah hong heh paisuak ding na hi hiam? Khang tawntungin heh paisuak ding na hi hiam?

⁶ Nangmah kong phat theih nadingun ko na mite hong nungtasak kik lo ding na hi hiam?

⁷ Topa aw, kote tungah na itna kip hong lak in la, na hotkhiatna kote hong pia in.

⁸ Topa Pasian’ thu gen ding hong zasak dih un, bang hang hiam cih leh amah in ama lamah a lungsim uh tawh a kiheite, ama mi siangthote, a mite tungah kilemna thu gen ding hi.

⁹ I gam sungah minthan’na a om theih nadingin amah a zahtakte’ adingin ama hotkhiatna hong om takpi hi.

¹⁰ Itna kip leh thutakna kigawm ding a, thumanna leh kilemna kihual ding uh hi.

¹¹ Leilak panin thutakna hong po khiato ding a, thumanna in vantung panin ensuk ding hi.

¹² Hi hi, Topa in a hoih nate hong pia ding a, i leitang in hauhna piangsak ding hi.

¹³ Thumanna in Topa’ mai-ah mapai ding a, ama lampi bawlkhol ding hi.