Late 8 - Tedim Bible

Pasian’ Liatna leh Mihing’ Thupina

¹ Topa, kote’ Topa aw, leitung khempeuhah na min bangzahin lian! Vantungah na min a than’na

² naungekte leh naupangte’ kam tawh kisa hi; gal na neih manin galte leh langpangte na daihsak nadingin panmun kip na bawl khin hi.

³ Na khutmete’ nasepna, na bawlsa kha leh aksite, na vantungte ka et ciangin,

⁴ nangma ngaihsut tham dingin mi in bang hi a, na phawk tham dingin mihing’ ta bang hi lel ahi hiam?

⁵ Ahi zongin, Pasian sangin a neuzaw deuhin amah na bawl a, minthan’na leh pahtawina na guan hi.

⁶ Na khut tawh na bawlsate khempeuh tungah ukna amah na pia hi.

⁷ tuu leh bawng khempeuh, gamsa khempeuh zong,

⁸ huih lak-a leeng vasate, tui sunga om ngasate, tui’ lampi-a tawn khempeuhte, na khempeuh ama khe nuai-ah na koih hi.

⁹ Topa, kote’ Topa aw, leitung khempeuhah na min bangzahin lian!