Late 79 - Tedim Bible

Biakinn Kininsak: Pasian’ Huh ding Ngetna

¹ Pasian aw, nangma luahna gam sungah dawi biate hong pai uh hi; amaute in nangma biakinn siangtho nin sak uh hi; amaute in Jerusalem siasak khin uh hi.

² Amaute in, nangma nasemte’ pumpite, a an dingun huih lak vasate pia uh a, na misiangthote’ sate, lei lak ganhingte pia uh hi.

³ Amaute in, Jerusalem kimkot-ah tui bangin amaute’ sisan buakhia uh a, amaute a vui ding kuamah om lo hi.

⁴ Kote in ka vengte uh’ zahko, ka kim uh-a omte’ ko leh nuihsat ka suak khin uh hi.

⁵ Topa aw, bang tanvei hi ding hiam? Heh paisuak ding na hi hiam? Nangma hazat hehna, mei bangin kuang paisuak ding ahi hiam?

⁶ Nangmah hong thei lo minamte tung leh, nangma tunga thu hong ngen lo kumpi gamte tungah heh gawp in.

⁷ Bang hang hiam cih leh amaute in ka mite uh thatmang khin a, ka gam sung uh susia gawp hi.

⁸ Ka pu ka pate uh mawhna hangin kote hong lang ngaihsut kei in la, kote hong kiniam koih mahmah ahih manin, kote hong dawntuah dingin na hehpihna hong paisak mengmeng in.

⁹ Kote’ kihotkhiatna Pasian aw, nangma min a than’ nadingin kote hong huh in la, nangma min hangin kote hong khahkhia-in ka mawhna uh hong maisak in!

¹⁰ “Amau’ Pasian koi-ah om hiam?” minamte in a cih ding bang hangin kilawm ding ahi hiam? Na nasemte’ sisan luangkhia phulakna pen, minamte’ lak, komau’ muhna-ah kitheisak in!

¹¹ Thongkiate’ taunate ngai in la, thah dinga a kisehte nangma vangliatna tawh kizui-in suakta sak in!

¹² Amaute in nang hong zahkona mah tawh ka vengte uh’ ang sungah a zah sagih-in thuk in, Topa!

¹³ Tua ciangin, nangma mi, nangma gamsung tuu ahi kote in, na tungah lungdamna kong lak ngitnget ding uh a, a khang a khangin nangmah phatnate ka gengen ding uh hi.