Late 76 - Tedim Bible

Zion-ah Pasian Liatna

¹ Judah gam sungah Pasian kithei a, Israel gam sungah ama min lian hi.

² Salem khua sungah ama omna kibawlin, Zion khua sungah ama teen’na mun kibawl hi.

³ Amah in tua lai-ah thaltangte, lum, namsau leh galhiamte kuaitan hi.

⁴ A om ngitnget mualliante sangin nang na min thangzaw-in na lianzaw hi.

⁵ Lungsim khauhte’ neihsa nate kisutkhia a, amaute ihmucip suak uh hi; gal hat mi khempeuhte in amau khut uh zang thei nawn lo uh hi.

⁶ Jakob’ Pasian aw, nangma thuhilhna hangin sakol leh a tung tuangpa khawlcip uh hi.

⁷ Ahih hangin nang zahtak-huai mahmah teh! Na heh khit phot ciangin nangma mai-ah kua ding zo ding ahi hiam?

^8-9 Vantung panin nangmah in thukhenna na genkhia hi; gimna a thuak leitung mi khempeuh hon dingin Pasian in thu khen ding hong kipat ciangin leitung lau-in taang loin om hi.

¹⁰ Mite’ hehna in nangmah hong kiphatna piangsak ding a, na hehna pan a suakta sun mite in nangmah pahtawina pawi bawl ding uh hi.

^11-12 Topa na Pasian’ tungah na thuciamnate uh bawl un la, tuate zui un; leitung kumpite tungah a zahtak-huai, uliante’ lungsim a niamkhiat, zahtak ding a hipa’ tungah, ama kim-a om mi khempeuhte in letsong puak ta uh hen!