Late 73 - Tedim Bible

BU III Migilote’ Daupaina; Amaute’ Mong leh Midikte’ Mong Etkakna

¹ A lungsim sung a siangtho, thutangte tungah Pasian hoih takpi hi.

² Ahih hangin kei ka hih leh ka khete kisuipuk dektak a, ka khe taal dektak hi.

³ Bang hang hiam cih leh migilote’ daupaina ka muh ciangin mi kihisakte ka eng hi.

⁴ Bang hang hiam cih leh amaute in nat velvalna thuak lo uh a, a pumpi uh cidamin zol hilhial hi.

⁵ Amaute in midangte bangin haksatna thuak lo uh a, amaute in midangte bangin gimna ngah lo uh hi.

⁶ Tua ahih ciangin amaute in kiphatsakna khainiang bangin ok uh a, ngongtatna puan bangin silh uh hi.

⁷ A lungsim panun gitlohna pusuak sak uh a, a ngaihsutna uh gitlohna tawh dimlet hi.

⁸ Amaute in mi thusim loin elpau uh a, kiliatsakna tawh sucip dingin mi tawng uh hi.

⁹ Amaute’ gensiatna in vantung ban a, kiliatsakna tawh leitungah thu gen kawikawi uh hi.

¹⁰ Tua ahih ciangin mite kihei-in amaute phat uh a, amau’ mawhna zong lo uh hi.

¹¹ Amaute in, “Pasian in bangci theih ding ahi hiam? Sang Penpa in phawk ding ahi hiam?” ci uh hi.

¹² En un, hihte migilo ahi hi; a tawntungin nuam takin om hithiat uh a, amaute a hauhna uh khang semsem hi.

¹³ Ka lungsim siang sak a, dikna tawh ka khutte ka sil siang hangin phattuamna om lo hi.

¹⁴ Bang hang hiam cih leh sunthapai-in gimna ka thuak a, zingsang simin hong kithuhilh hi.

¹⁵ “Hih bangin thu gen ning,” a ci hi leng, nangma mite tunga thutak lo ka suak ding hi.

¹⁶ Ahih hangin, hih thu a bangci hiam ci-a ka ngaihsut ciangin kei adingin a lunggim-huai mahmah nasep khat hong suak a,

¹⁷ Pasian’ biakinn sungah ka pai ciangin a thu tawpna dongte ka tel hi.

¹⁸ Nangmah in amaute mun nalna-ah na koih takpi a, a sia dingin amaute na tuksak hi.

¹⁹ Tomno sungin amaute kisusia-in, launa in nilkhia mang!

²⁰ Amaute pen mi khat in mang a mat tawh kibang a, na khan’lawh ciangin amaute a bangci hiam cih na phawk nawn kei hi.

²¹ Ka lung khamin ka lungsim hong nat ciangin,

²² keimah hai-in bangmah ka thei kei a, nangma mai-ah ganhing tawh ka kibang hi.

²³ Ahih hangin nangmah tawh ka omkhawm ngitnget a, ka khut taklam-in nong len hi.

²⁴ Nangma thugenna tawh keimah lam nong lak a, a nung ciangin minthan’na tawh keimah nong sang ding hi.

²⁵ Nang sim loh vantungah kua nei ka hi hiam? Nang sim loh ka deih ding leitungah kuamah om lo hi.

²⁶ Ka lungsim leh ka pumpi zawngkhal kha ding a, ahih hangin Pasian in ka lungsim hatna leh keima aa hi tawntung ding hi.

²⁷ Bang hang hiam cih leh, en in, nangmah tawh a kigamlate kisia ding a, nangma tunga hong khialte na beisak hi.

²⁸ Ahih hangin kei adingin Pasian kianga om ding hoih hi; na nasepnate khempeuh ka gen theih nadingin Topa ka Pasian kong bel hi.