Late 68 - Tedim Bible

Pasian’ Gualzawhna La

¹ Pasian tho hen la, ama galte kithehthangsak hen; amah a mudahte ama mai-ah tai uh hen.

² Meikhu a kilenkhiatsak bangin amaute hawlkhia ding hi; mei mai-ah khuainun a tui bangin Pasian’ mai-ah migilote siamang ding hi.

³ Ahih hangin midikte lungdam ding hi; Pasian’ mai-ah amaute nuamin diang ding hi; amaute lungdamin awng ding uh hi.

⁴ Pasian’ tungah la sa un la, ama min phatna la sa un; meiite tunga tuangpa lasak un; ama min in Topa ahi hi, a mai-ah lungdamin diang un!

⁵ Pa nei lote’ pa leh meigong numeite a hupa in, ama omna siangtho sunga om Pasian ahi hi.

⁶ Pasian in a cimawhte a ten’ nading inn pia hi; amah in thongkiate nopsakna munah tun hi; ahih hangin mi lehdote ahih leh keugaw gamah teeng uh hi.

⁷ Pasian aw, nangma mite’ mai-ah na kuankhiat ciang, gamlak nawkin na pai ciangin,

⁸ nangmah Pasian na om manin lei lingin, vantungte in guah zusak hi; Pasian ahi, Israelte’ Pasian’ omna-ah Sinai mual nangawn ling hi.

⁹ Pasian aw, na luah mite vulgawp ahih manin guah tampi zusakin na nosuak sak kik hi;

¹⁰ na mihonte in tua sungah om nading mu uh hi; Pasian aw, nangma hoihna tawh a cimawhte’ kisapna na guan hi.

¹¹ Topa in thu pia hi; hih thu a pua mihonte tam mahmah hi:

¹² “Kumpite’ galkapte, tai uh!” ci uh hi. Inn-a om nupite in galte’ van kisutte hawm uh a,

¹³ Meiphual gei-ah na ihmut laitak nangawn un, ngun leh kham mel tawh a kizem keima vakhu khate tawh na kibang ding uh hi.

¹⁴ Vanglianpa in tua gam pan kumpite a nawhkek ciangin Zalmon mual tunga vuk kia tawh kibang hi.

¹⁵ Aw mual lianpi, Bashan mual; aw, mualdawn zum tampi a nei, Bashan mual!

¹⁶ Mualdawn zum tampi a nei mual aw, Pasian in ama om nadinga a deih mual, Pasian a om tawntung nading mun, bang hangin en’na tawh en na hi hiam?

¹⁷ Leng muan’huai tulsawm kop nih, a tul a tul tawh, Sinai mual panin siangtho munah Topa hong pai hi.

¹⁸ Topa nangmah Pasian tua munah na om theih nadingin a sangna-ah kahto-in salte na paipih a, mite leh mi lehdote’ tung nangawn panin piakkhong nate na ngah hi.

¹⁹ Ni simin eite’ adinga hong thuaksak Topa in thupha ngah ta hen; Pasian in eite’ kihotkhiatna ahi hi.

²⁰ Eite’ Pasian in hotkhiatna Pasian ahi hi; sihna panin suahtakna in Topa Pasian aa ahi hi.

²¹ Ahih hangin Pasian in, mawhna tawh a gamtapa leh a galte’ lutangte sukham ding hi.

^22-23 Topa in, “Note in sisan sungah na khe uh sil-in, na uite un, galte si a liak theih nadingin Bashan mual panin galte lakhia kikin, tuipi thuk sung panin ka kaikhia kik ding hi,” a ci hi.

²⁴ Pasian aw, ka Kumpipa ahi, keima Pasian, biakinn sungah zahtakhuai taka na paina kimu a—

²⁵ a mai-ah la sate, a nungah tamngai tumte, a laizang-ah nungak khuangtumte in:

²⁶ “Israel’ suan-le-khakte aw, mipi kikhopna sungah Topa Pasian phat un!”

²⁷ Amaute lakah a neupen Benjamin in a mapi-in om a, amau’ hon lakah Judah kumpite, Zebulun kumpite, Naftali kumpite om uh hi.

²⁸ Pasian aw, na vangliatna thu pia in; kote’ adinga hong bawlsak Pasian aw, na thahatna lak in.

²⁹ Jerusalem-a na biakinn hangin kumpite in nang tungah letsong hong puak uh hi.

³⁰ Pumpeng lak-a teeng ganhingte, minamte’ bawngno lak a, bawngtal honte taigawp in. Siah a lunggulhte tuancil in la, gal a uuk mite, thehthang gawp in.

³¹ Izipt gam panin sumngo lakhiasak in la, Pasian tungah thungetna-in Ethiopia gam a khut zansak mengmeng in.

^32-33 Leitung kumpi gamte aw, Pasian’ tungah la sa un; vantung, tanglai vantung-a tuang Topa phatna la sa un; en un, ama aw, a vanglian ama aw hong gingkhia sak hi.

³⁴ Israelte tunga a lian, Pasian’ hatna pahtawi un; ama vangliatna vantung ah om hi.

³⁵ Israelte’ Pasian in ama biakinn sungah zahtak-huai a, ama mite tungah vangliatna leh thahatna pia hi. Pasian in thupha ngah ta hen!