Late 65 - Tedim Bible

Leitang a Hoihsak Pasian Phatna

¹ Pasian aw, Zion-ah nangmah phat dingin kilawm hi; nangma tunga thuciamna sate hong kibawl ding hi.

² Nangmah in thungetna a za-pa na hi hi! Mawhna thu hangin nangma kiangah mi khempeuh hong pai ding uh hi.

³ Ka mawhnate un kote hong zawh ciangin, nangmah in tuate nong maisak hi.

⁴ Na inn-a om dinga na tel na lakte in mi nuamsa ahi hi! Nangma biakinn siangtho ahi na inn sunga hoihna tawh lungkim nung!

⁵ Tuipi gamla pente leh leimong dong khempeuhte’ lametna, komau’ kihotkhiatna Pasian,

⁶ nangma thahatna tawh mualte a bawl, vangliatna tawh a kidim,

⁷ tuipi gingte, tuihual gingte, mi gamlumte a daisakpa aw,

⁸ lei mong pek-a omte in na hihsa limte a kihtak nadingun kihtakhuai gamtatna zangin, hotkhiatna tawh kote’ ngetna nong pia hi; nisuahna leh nitumna kikal-a om mite khempeuh lungdam-a awng dingin na bawl hi.

⁹ Nangmah in leitung en-in guah na zusak a, a hoihna lianpi-in na behlap hi; Pasian’ gunpi in tui tawh kidim hi; nangmah in amaute khaici na guan hi, tua ahih ciangin nangmah in na bawl khol hi.

¹⁰ Tu ma-kuakte tui tampi na buak a, leivumte zalh mai-in, guahtui tawh na nipsak a, a po kungte thupha na pia hi.

¹¹ Nangma hauhna tawh kum na phasak a, na leng paina tengah sathau taak hi.

¹² Ganhing tatna, a noptuak munte-ah ganhing hon omin mualte lungdamna tawh kidim a,

¹³ lo no-na munte tuuhon tawh kizem-in, kuampite an tawh kidim a, lungdamin awngin amaute in la sakhawm uh hi.