Late 63 - Tedim Bible

Pasian in a Dangtakte Phasak

¹ Pasian aw, nangmah in keima Pasian na hi hi, nangmah kong zong hi, ka lungsim khempeuh tawh nang kong deih hi; tui om lohna gamkeu bangin ka pumpi in nang hong deih hi.

² Tua ahih ciangin na vangliatna leh na minthan’nate mu dingin biakinn sungah nangmah kong en hi.

³ Na itna kip in nuntakna sangin hoihzaw ahih manin, nangmah ka hong phat ding hi.

⁴ Tua ahih ciangin ka nuntak lai teng nangmah kong phat ding a, ka khutte nang lamah lamto-in thu kong ngen ding hi.

^5-6 Ka lupna tungah nangmah hong ngaihsun-in, zan-in nangmah kong lungngaih ciangin, guhngek leh sathau ne bangin ka lung tai a, lungdamna tawh nangmah phatna la ka sa ding hi.

⁷ Bang hang hiam cih leh nangmah in kei hong huhpa na hi a, nangma hutna sungah lungdamin la ka sa hi.

⁸ Nangmah ka hong bel hi; nangma taklam khut in kei hong len hi.

⁹ Ahi zongin kei thah dingin a hong zongte pen lei thukpi sungah paisuk ding hi;

¹⁰ Amaute pen gal sungah si ding uh a, ngiate’ an suak ding uh hi.

¹¹ Ahih hangin Pasian sungah kumpipa lungdam ding hi; amah tawh thuciam khempeuhte zong minthang ding hi; bang hang hiam cih leh zuauthu gente kamte kihubing ding hi.