Late 62 - Tedim Bible

Pasian pen, a Khem thei mite kiang panin Belh dingpa

¹ Dai dide-in Pasian bek ka ngak hi; keima kihotkhiatna ama tung pan hong pai hi.

² Ka suangpi, ka kihotkhiatna, ka munkip muan’huai in amah bek hi a, kei ka kinak lin' kei ding hi.

³ Note khempeuh in, a hoi kawm, a kiliing gawl tawh a kibang mi khat, susia dingin bang tanvei hih huan ding na hi uh hiam?

⁴ Ama za-liatna panin sukniam ding bek amaute in sawm uh hi. Amaute in thuman lo-ah nuam sa uh hi. Amaute in a kam uh tawh phat uh a, ahih hangin a sungtawng uh-ah samsiat uh hi.

⁵ Ka lametna ama tung pan ahih manin, dai takin Pasian bek ka ngak hi.

⁶ Ka suangpi, ka kihotkhiatna, ka munkip muan’huai in amah bek hi a, kei ka kiling kei ding hi.

⁷ Keima suahtakna leh ka minphatna Pasian’ hang ahi hi; a muan’huai ka suangpi, ka bukna in Pasian ahi hi.

⁸ Mite aw, amah muang tawntung un; na lungkhamna teng uh ama tungah gen un; Pasian in eite’ bukna ahi hi.

⁹ Mineute ahih leh husan’ bang bek hi a, miliante pen a hawmpi ahi hi; tawikhaina-ah amaute in lek lo uh hi; amaute a kigawmin husan’ khat sangin zangzaw uh hi.

¹⁰ Zawhthawh thu tawh lakna muan’in, nei kei in la, suhgawpnate lamet-in nei kei in; na hauhna a khan’ leh, tuate muan’ in nei kei in.

¹¹ Pasian in khatvei thu gen khin hi, ke’n hih thu nihvei za khin ing; vangliatna in Pasian’ neihsa ahi hi;

¹² Topa aw, itna kip in nangma aa hi. Bang hang hiam cih leh mite ama sepna bangin na thukkik hi.