Late 6 - Tedim Bible

Lungkham Ciangin Hehpih ding Ngetna

¹ Topa aw, na heh laitak hong tai kei in la, lungso sa-in hong thuhilh kei in.

² Topa aw, thanem ka hih manin kei tungah dikna hong zang in; Topa aw, ka guh ka tang na ahih manin hong dam sak in.

³ Ka hin’ gim mahmah hi. Topa— bang tanvei hong sawt lai ding na hi hiam?

⁴ Topa aw, hong kihei in la kei hong gum in; itna kip neipa na hih manin keimah hong hon in.

⁵ Bang hang hiam cih leh sihna-ah nangmah phawk theihna om lo ahih manin, Leinuai panin kua in nang hong phat thei ding ahi hiam?

⁶ Ka tautauna-in ka gim hi; zan sialin ka khitui in ka lupphah tum a, ka kahkahna-in ka lupna kawt dikdek hi.

⁷ Dahna hangin ka mit mial a, ka galte’ hangin ka mitzung zaw semsem hi.

⁸ Siatna bawlte khempeuh aw, ka kiang panin kihemkhia un; bang hang hiam cih leh Topa in ka kahna aw a za zo hi.

⁹ Topa in ka thumna za zo a, Topa in ka thungetna hong sang hi.

¹⁰ Ka galte khempeuh zahhuai in genthei mahmah ding uh hi; amaute in nungkik-in, maizumna thuak pah ding uh hi.