Late 58 - Tedim Bible

Migilote tungah Thuk ding Ngetna

¹ No gam ukte aw, a manin thu na khen uh hiam? Note in mi khempeuh thu a tangin na khen uh hiam?

² Hi peuhmah lo hi, na lungsim uh ah aman lo na ngaihsun uh a, gam sungah ngongtatna na gamta uh hi.

³ Migilote, a khan’ tawntungin khial uh hi, a suah tung mah-un lam khial pah uh a, zuauthu gen uh hi.

^4-5 Amaute in gulpi’ gu bang gu nei uh a, a khiimte’ aw ahi zongin, a zol siamte’ aw ahi zongin a za lo, gul bengngong tawh kibang uh hi.

⁶ Pasian aw, amau kam sunga hate sutan in la, humpinelkai khanglai hatute botkhia in, Topa aw.

⁷ Tui luangkhiate bangin amaute mangthangsak in la, lopa bangin amaute kituancil-in keutumsak in.

⁸ Amaute, a naai a bei toktol, a hun cing loin a nausuak, ni a mu ngei lote bangsak in.

⁹ Na beelte in lingkung kuang pen sa a sak ma-in, a hing a keu-in amah in tuate phiatkhia mang hen!

¹⁰ Heh thukna a muh ciangin thuman mipa lungdam ding a, migilote’ si sungah amah in a khete sil ding hi.

¹¹ Mite in, “Thuman mi’ ading noptuamna om taktak a, leitunga thukhen Pasian khat om taktak hi,” ci ding uh hi.