Late 57 - Tedim Bible

Pasian’ Hut ding Lung muang-a Ngetna

¹ Pasian aw, nangmah hong bel ka hih manin kei hong hehpih in, kei hong hehpih in; siatna huihpi a ven’ mateng na kha limah kong bu ding hi.

² A Sang Penpa Pasian’ tung, kei’ Pasian’ tung, kei’ adingin ama deihna a tungsak Pasian’ tungah ka ko hi.

³ Amah in vantung panin hong dawngin keimah hong hon ding a, amah in kei hong tuancilte maizumin koih ding hi. Pasian in a itna kip leh a thumanna hong lak ding hi.

⁴ Mihing tate, huaihamna tawh a netum humpinelkaite laizang ah ka om hithiat hi; amau hate in teipi leh thaltangte hi a, amau leite in namsau hiamte ahi hi.

⁵ Pasian aw, vantung’ tungah sangto lai in! Leitung khempeuhah na minthan’na omsak in!

⁶ Amaute in ka khe, thang hong siah uh hi; lungkhamin hong koih uh hi. Ka pai nading ah gum khat to uh a, ahih hangin tua sungah amaute mah kia uh hi.

⁷ Ka lung muang hi, Pasian aw, ka lung muang hi! La ka sa ding a, nakpi takin ka sa ding hi.

⁸ Ka tho ding hi! Harp lasakna leh laiza lasakna aw, tho un! Zingsang khuavak hong phong ning!

⁹ Topa aw, mite lakah nang tung lungdamna kong ko ding a, minamte lakah nangmah phatna ka sa ding hi.

¹⁰ Bang hang hiam cih leh na itna kip in vantung ban a, na thumanna in meiipi banto hi.

¹¹ Pasian aw, vantungte’ tungah sangto lai in! Leitung khempeuhah na minthan’na om sak in!