Late 52 - Tedim Bible

Edom mi Doeg Saul kiangah a taina

¹ Mi thahatpa aw, bang hangin miphate suksiatna-ah kiphasak na hi hiam? Sunthapai-in nang in suksiatna na ngaihsun hi.

² Zuau nasempa aw, na leii in mulkiatna temhiam khat tawh kibang hi.

³ Nang in hoihna sangin siatna na deihzaw a, thuman genna sangin zuauna na deihzaw hi.

⁴ Mi khem theipa aw, a siasak thei kammal khempeuh na deih hi.

⁵ Ahih hangin Pasian in nang hong susia paisuak ding hi; amah in nang hong bawhin na buk panin hong kaikhia ding hi; a hingte’ leitang panin nang hong zunglot ding hi.

⁶ Thuman mite in mu-in, lau ding uh a, amah nuihsan-in,

⁷ “Pasian a beel lo, ama hauhnate a muang, ama hauhna a beelpa en un!” ci ding hi.

⁸ Ahih hangin kei ka hih leh Pasian’ inn sunga oliv kung hing tawh ka kibang hi. Pasian’ itna kip ka muang ngitnget hi.

⁹ Hih bang bawl khin na hih manin, na tungah ka lungdam ngitnget ding hi. Thuhoih ahih manin, miphate’ omna-ah na min ka taangko ding hi.