Late 48 - Tedim Bible

Zion a Hoihna leh a Muan’huaina

¹ Topa lian hi, i Pasian khuapi sungah a mual siangtho sungah nakpi taka phat ding ahi hi!

² Kumpi lianpa’ khuapi, lei lulam-a om ama mual siangtho hoih-a a sang mahmah Zaphon in Zion Mual hi a, leitung khempeuh’ lungdamna ahi hi.

³ A muan’huaina tua mual-ah Pasian in amah a hu’ taktakpa ahihna a lak khin hi.

⁴ Ahi zongin, en un, kumpite kikaikhawm in, hong paikhawm uh hi.

⁵ Amaute in tua a muh phetun lamdang sa a, amaute dipkua vatin tai uh hi;

⁶ numei nausuak na a sa bangin amaute liinggawp uh hi.

⁷ Nisuahna huihpi tawh Tarshis kici teembaw liante nang na susia hi.

⁸ Ka zaksa bangun, mi honte’ Topa’ khuapi sung, i Pasian’ khuapi sungah, Pasian in a phuh kip ngitngetsa ka mu uh hi.

⁹ Pasian aw, na biakinn sungah nangma itna kip ka ngaihsun uh hi.

¹⁰ Pasian aw, na min in leimong dong a zelh bangin, nangmah hong kiphatna in zong a zel hi. Na taklam khut in gualzawhna tawh a kidim hi;

¹¹ Zion Mual lungdam sak in! Na thukhenna hangin Judah’ mite lungdam sak in!

^12-14 Hih in i Pasian hi a, a tawntung-a eima Pasian hi, ci-a khangkikte tungah na gen theih nadingun, Zion kim velin pai-in, a tausangte sim un la, a kulh phungmai hoihte ngaihsunin, a phualpi muan’huaite va nawk kim un. Amah in a tawntungin eite, lam hong lak dingpa ahi hi.