Late 47 - Tedim Bible

Pasian pen, Leitung bup Kumpi ahihna-ah Minamkimte’ Lungdamna

¹ Mi khempeuh aw, na khut uh beeng un! Lungdamna la nakpi-in sa-in Pasian phat un.

² Bang hang hiam cih leh Topa, a Sang Penpa, dipkuat-huai-a, leitung khempeuhah kumpi lian khat ahi hi.

³ Mi khempeuh eima nuai-ah, minamte i khe nuai-ah amah in hong zawhsak hi.

⁴ Ama itpa Jakob’ angtan’pih ahi, eima luah ding amah in hong teelsak hi.

⁵ Aw ging tawh Pasian paito a, pengkul aw tawh Topa paito hi.

⁶ Pasian tungah phatna la sa un, phatna la sa un! I Kumpipa tungah phatna la sa un, phatna la sa un!

⁷ Bang hang hiam cih leh Pasian in leitung khempeuhte’ Kumpi ahi hi; lasakna tawh amah phat un!

⁸ Minamte tungah Pasian maang hi; a tokhom siangtho tungah Pasian tu hi.

⁹ Uliante in Abraham’ Pasian’ mite tawh kikhawm uh hi. Bang hang hiam cih leh leitung’ lumte in Pasian aa ahi hi; amah sangpi-in kithangsak hi!