Late 44 - Tedim Bible

Lungkham hunin Ni dang-a Hotkhiatna Phawk

¹ Pasian aw, ka pu ka pate uh hun lai-a na hihna sate, amaute in kote tungah hong gen uh a, kote in ka bil uh tawh ka za khin uh hi.

² Na khut tawh minam dangte na hawlkhia a, ahih hangin amaute na phut hi; midangte na sugawp a, ahih hangin amaute na suakta sak hi;

³ bang hang hiam cih leh amaute in amau namsau tawh leitang ngah lo uh a, amau khut in amaute gualzawhna pia lo hi; na khut taklam leh na baan, na hehpihna maipha hizaw hi; bang hang hiam cih leh amau sungah nang na lungkim hi.

⁴ Nangmah in Jakob’ adingin gualzawhna a sehkhol, ka Kumpi leh ka Pasian na hi hi.

⁵ Nangma hangin ka galte uh ka sawnpai uh a, ko hong dote, na min suangin ka tuancil uh hi.

⁶ Bang hang hiam cih leh keimah in ka thalpi ka suang kei a, ka namsau in zong kei hong hon zo lo hi.

⁷ Ahih hangin nang in ka galte kiang panun kote nong hon khin a, ko hong mudahte na zahhuai gawp sak khin hi.

⁸ Pasian sungah kote ka angtang ngitnget uh a, nangma tungah ka lungdam tawntung ding uh hi.

⁹ Ahih hangin nangmah in kote hong nusia-in, nong min siasak khin a, ka galkap hon uh tawh nang na kuankhawm kei hi.

¹⁰ Galte kiang panin kote nong nungkiksak a, ka galte un ka neihsa teng uh bu-luah khin uh hi.

¹¹ Tuu gawh ding bangin kote nang nong bawl a, minamdangte lakah nong thehthang khin hi.

¹² Na mite a man tawmno khatin na zuak a, a man ding na sang nget kei hi.

¹³ Ka vengte uh’ zahko, ka kim uh-a omte’ nuihsat leh thusim lohin kote nong bawl khin hi.

¹⁴ Minamdangte lakah a sia lam-a gentehna, mite lakah ciamnuih-a neih-in kote nong bawl khin hi.

^15-16 Keimah hong ko mi leh hong minsiasak mite’ kam ahi zongin, galte leh langpangte’ maitang hangin ahi zongin, sunthapai-in ka zahhuai den a, maizumna tawh ka kidim hi.

¹⁷ Na thuciamna-ah khial lo napi, nangmah hong mangngilh lo napi in, hihte khempeuh ko tungah hong tung khin hi.

^18-19 Ngiate omna-ah kote hong balnenin, khuamialpi sungah nong paihdak dinga kilawm zahin, ka lungsim uh kihei nai lo a, ka kalsuan uh lampial nai lo hi.

²⁰ Ka Pasian uh’ min mangngilh khinin, pasian dang tungah ka khut uh khak khin hi le ung,

²¹ Pasian in hih thu mukhia lo ding ahi hiam? Bang hang hiam cih leh amah in lungsim thusim a thei hi.

²² Nangma hangin sunthapai-in kote hong kithat a, gan gote tuu gawh ding bangin hong kikoih hi.

²³ Topa aw, bang hangin ihmu na hi hiam? Nangmah hong thotawm in! Khanglo in! Kote hong nilkhia suak kei in!

²⁴ Bang hangin na maitang seel na hi hiam? Bang hangin ka thuakna uh leh hong kisukcipna mangngilh na hi hiam?

²⁵ Bang hang hiam cih leh lei lakah ka puk uh a, leivui lakah gual lelin ka lum uh hi.

²⁶ Tho to in, ko huh dingin hong pai in! Na itna kip hangin kote hong honkhia in!