Late 42 - Tedim Bible

BU II Sal-a om hun leh Lungkham hunin Pasian lunggulhna

¹ Sakhi in luitui luang sialsial a lunggulh bangin, nang kong lunggulh hi, Pasian aw.

² A nungta Pasian kong deih hi. Cik ciangin keimah hong pai-in Pasian’ maitang en ding ka hi hiam?

³ Mite in keima tungah, “Na Pasian koi-ah om hiam?” hong cihcih sung teng, sun leh zanin ka khitui an-in ka nei hi.

⁴ Ka lungsim sung ka suahkhia a, pawi bawl mi honkhat, kipak a otna leh nuamna la tawh Pasian’ innah ka makaihna, mihon tawh ka paina ka phawk hi.

⁵ Bang hangin khakunkun ka hi hiam, bang hangin lunghimawh ka hi hiam? Pasian’ sungah lametna nei ning; bang hang hiam cih leh kei hong huhpa ka Pasian ka phat kik na ding hi.

⁶ Ka lungsim tamkham hi; tua ahih manin Jordan leh Hermon gam, Mizar mual tung panin nang kong phawk hi.

⁷ Nangma tuizeu ging tawh tui thukte khat leh khat kidawng a, na tuihual neu leh na tuihual liante in kei hong tuum hi.

⁸ Topa in sunin a itna kip hong sawl hi; zan ciangin nuntakna hong pia Pasian tungah thungetna la ka sa hi.

⁹ “Bang hangin kei hong mangngilh khin na hi hiam? Galte’ sukcip manin bang hangin kapin ka kidik hiam?” ci-in ka Pasian, ka suangpi tungah ka gen hi.

¹⁰ Ka langte in kei tungah, “Na Pasian koi-ah om ahi hiam?” hong cihcih sung teng, ka sungah meima nai tawm bangin hong tum ngangngang hi.

¹¹ Bang hangin khakunkun ka hi hiam, bang hangin lunghimawh ka hi hiam? Pasian’ sungah lametna nei ning; bang hang hiam cih leh kei hong huhpa ka Pasian ka phatkik na ding hi.