Late 38 - Tedim Bible

Gimna a Thuak, a Kisik mipa’ La

¹ Topa aw, na hehna tawh hong tai kei in la, lungso sa-in hong thuhilh kei in!

² Bang hang hiam cih leh na thaltangte ka sungah hong tum khin a, ka tungah na khut hong tu khin hi.

³ Nangma hehna hangin ka ci na a, ka mawhna hangin ka pumtangin ka na hi.

⁴ Bang hang hiam cih leh ka mawhnate in ka lu tuum zo a, keima puak ding a giklua van-gik tawh kibang hi.

⁵ Ka haina hangin ka liamnate nai-in uih a,

⁶ hong kikunsak, hong kibokcip sak hi; sunthapai-in kapin ka vak kawikawi hi.

⁷ Bang hang hiam cih leh ka ci sa mahmah a, nakpi takin ka ci na hi.

⁸ Ka tha bei khinin hong kinengcip hi; ka lungsim buaina hangin ka tau hi.

⁹ Topa aw, ka deihna khempeuh nang na thei a, ka khuisatna nang kiang pan kiseel lo hi.

¹⁰ Ka lungtang kisat a, ka tha in lel hi; ka mit in zong khua mu thei nawn lo hi.

¹¹ Ka gim thuakna-ah ka lawmte leh ka kithuahpihte kidaang koih uh a, ka behte kei kiang pan gamla om uh hi.

¹² Kei hong that nuamte in a thang uh zakin, kei’ nat nading a zongte in siatna thu gen uh a, sunthapai-in khemna bek ngaihsun uh hi.

¹³ Ahih hangin kei pen bilngong ka bang a, khua ka za kei hi, a kam ka lo, a pau theilo mi ka bang hi.

¹⁴ Hi hi, bil khua za lo, taina kam a zang lo mi khat tawh kei ka kibang hi.

¹⁵ Ahih hangin, Topa aw, nangmah kong ngak hi; Topa ka Pasian aw, hong dawng dingpa nangmah na hi hi.

¹⁶ Bang hang hiam cih leh, “Ka khe a taal ciangin kei tungah hong kihisakte, kei’ tungah lungdamsak kei un,” cih bek kong thum hi.

¹⁷ Bang hang hiam cih leh puk dingin ka kithawi a, ka gimna kam tuan lo hi.

¹⁸ Ka thuman lohna ka pulak a, ka mawhna hangin ka dah hi.

¹⁹ Thuman lopi-a ka gal a hite thahat a, kei hong mudah khialte tam mahmah hi.

²⁰ A hoih zui ka hih manin hoihna pen siatna tawh hong thukte ka langpangte ahi hi.

²¹ Topa aw, kei hong nusia kei in! Ka Pasian aw, ka kiang panin gamla om kei in!

²² Topa, ka kihotkhiatna aw, keimah huh dingin hong manlang in!