Late 35 - Tedim Bible

A kheem thei Galte tungah a Man-a Hih ding Ngetna

¹ Topa aw, kei hong pangte langpang in la, kei hong dote do in!

² Lum lian leh lum neu la in la, keimah hong huh in!

³ Teipi leh teitangzang dok in la kei hong delhte’ lam ngat in! Keima tungah, “Kei in nangma kihotkhiatna ka hi hi!” hong ci in.

⁴ Kei hong sawmte mai zumin mindaisak ta in! Keima siat nading a bawlte nungkiksak in la siasak ta in!

⁵ Topa’ vantungmi’ hawlna tawh amaute huih letkhiat ansite tawh kibangsak in.

⁶ Topa’ vantungmi’ delhna-ah a taina lampi uh mial-in nal sak in.

⁷ Bang hang hiam cih leh amaute in thu om lopi-in a ngenthang uh tawh kei hong siah uh a, thu om lopi-in gum to-in kei hong siah uh hi.

⁸ A phawk loh kalun amau tungah siatna tung sak in! Amau ngenthang siahsimna uh ah amaute mah awksak in la, a kisia dingin amaute kiasak in.

⁹ Tua ciangin Topa tungah ka lungdam ding a, ama hotkhiatna-ah nuamin ka diang ding hi.

¹⁰ Ka lungsim khempeuh tawh “Topa aw, ama adinga a hat luate kiang panin a thahat lo mi a gumkhia, a neihsa a sutkhia mi kiang panin mi thahat lo a zawng a gumkhiapa ahi, nang tawh a kibang kua ahi hiam?” ka ci ding hi.

¹¹ Mi a el tecite hong kipan uh a, ka theih loh thute kei hong dong uh hi.

¹² Amaute in hoihnate siatna tawh kei tungah hong thuk uh a, ka khawngai mahmah hi.

¹³ Ahih hangin kei ahih leh, amaute a cinat uh ciangin—puanhampi silhin an tangin kei ka kigim tawmsak hi. Ka ang ah ka lu phumin thu ka ngen a,

¹⁴ ka lawm, ka sanggampa’ hanga dah bangin ka dah hi; a nu’ hanga kap mi bangin kapin ka vak kawikawi a, kunin ka kidikdik hi.

¹⁵ Ahih hangin kei ka tukna-ah amaute nuamin kikhawm uh a, keimah langpangin kikaikhawm uh hi; ka theih ngei loh khebaite nangawn in tawlnga loin kei hong gensia hi;

¹⁶ zahtakna mel nei loin hong zahko uh a, a ha uh kei hong gawisan uh hi.

¹⁷ Topa aw, bang tanvei hong en khong ding na hi hiam? Amau hong sukgawpna panin keimah hong honkhia in la, humpinelkaite kiang panin ka nuntakna hong hon in.

¹⁸ Tua ciangin mihon kikhopna lian sungah na tungah lungdamna kong ko ding a, mi honpite lak panin nang kong phat ding hi.

¹⁹ A man lopi-a ka gal a hite kei tungah lungdamsak kei in la, thu om lopi-a kei hong mudahte, mit-heek kipiasak kei in.

²⁰ Bang hang hiam cih leh amaute in kilemna thu gen lo uh a, gam sunga dai taka mi omte lang pangin, khemna thu ngaihsun uh hi.

²¹ Amaute in kei hong kamkat beba uh a, amaute in, “Ha, Ha! mu khin hang ei!” ci uh hi.

²² Topa aw, na mu khin hi, dai om kei in! Topa aw, kei kiang panin gamla om kei in!

²³ Ka Topa ka Pasian aw, ka thu hong thei in la, kei’ adingin nangmah hong kisosuah tawm in!

²⁴ Topa ka Pasian aw, nangma thumanna tawh kituakin keima thutan’na hong langsak in la, amaute kei tungah lungdamsak kei in!

²⁵ Amau leh amau tungah, “Ha, i tuptup tung ei!” kici sak kei in. “Amah nawmvalh tum khin hang,” amaute cisak kei in.

²⁶ Kei’ kamsiatna-ah a lungdamte maizumsak in la zahhuai gawp sak in! Kei tunga hong kiliansakte maizumna leh mindaina silh sak in!

²⁷ Kei’ thutan’na lah khiat ding a deihte lungdamin, awng-in, kipaksak in la, a tawntungin, “A nasempa’ hoihna-ah a lungkim Topa lian hi,” cici sak in.

²⁸ Tua ciangin na thumanna leh nangmah phatna sunthapai-in ka gengen ding hi.