Late 34 - Tedim Bible

Topa in Ama aate Kemin a Hutna

¹ Topa ka phat tawntung ding hi; amah phatna ka gengen ding hi.

² Topa ka phat ding hi; gimna thuakte zasak un la lungdam uh hen.

³ Kei tawh Topa nak phat un, ama min pahtawi khawm ni!

⁴ Keimah in Topa ka zong a, amah in kei hong dawngin, ka launa khempeuh panin hong honkhia hi.

⁵ Amah en un la, maitai un; tua hi leh na mai uh zum ngei lo ding hi.

⁶ Hih mi hehpihhuaipa kiko-in, Topa in amah za a, ama haksatna khempeuh panin honkhia hi.

⁷ Amah a zahtakte’ kim-ah Topa’ vantungmi in giahphual sat a, amaute honkhia hi.

⁸ Topa’ hoihna sin un la, hoih hi, ci-in thei un! Amah a bel mi in lungdam hi.

⁹ Ama mi siangthote aw, Topa zahtak un, bang hang hiam cih leh amah a zahtakte in kisapna nei lo hi.

¹⁰ Humpinelkai khang laite in kisapna leh gilkialna thuak hi; ahih hangin Topa a zongte in na hoih a kisap uh om lo hi.

¹¹ Tate aw, hong pai un la, hong ngai un. Topa zahtakna kong hilh ding hi.

¹² Hoihna a neih theih nadingin nuntakna leh khan’sau a deih kua ahi hiam?

¹³ Siatna panin na leii kem in la, zuau genna panin na muk kem in.

¹⁴ Siatna panin kihemkhia in la, a hoih bawl in; nopna zong in la, delh in.

¹⁵ Topa' mit in thumante’ lam en a, a bil in amau kikona lam nga hi.

¹⁶ Siatna bawl mite leitung panin a kiphawkna a kisuktat nadingin Topa in amaute langpang hi.

¹⁷ Huh ngen dingin thumante a kiko ciangin Topa in za a, a haksakna khempeuh panun amaute honkhia hi.

¹⁸ Lungsim kitamzante kiangah Topa om a, lungsim zan-gawpte hon hi.

¹⁹ Thuman mi’ thuakna a tam hangin tuate khempeuh panin Topa in amah hon hi.

²⁰ Amah in a guh khempeuh kem hi; khat zong kitan lo hi.

²¹ Siatna in migilote that ding a, thuman mudahte kidantat ding hi.

²² Topa in ama nasemte honkhia hi; amah a bel mi khat beek kidantat lo ding hi.