Late 33 - Tedim Bible

A Piangsak, a Kem, Pasian Phat un

¹ No thuman mite aw, Topa tungah lungdam un! Pahtawina in thutangte tawh kilawm kituak hi.

² Laiza khausai lasakna tawh Topa phat un la, harp zang sawm khausai lasakna tawh ama tungah la ngaih sa un!

³ Ama tungah la thak sa un la, a gingin hoih takin khausai tum un.

⁴ Bang hang hiam cih leh Topa’ thu tang a, ama hihna khempeuh thuman tawh sem hi.

⁵ Amah in thumanna leh thutan’na deih a, leitung in Topa’ itna kip tawh kidim hi.

⁶ Topa’ kampauna tawh vantung piang a, ama kam pan-a husan’na tawh vantung nate a piang hi.

⁷ Amah in tuipi tuite thawlkhat sunga thun bangin khawm a, tui thukpite tuibem-ah koih hi.

⁸ Topa pen leitung khempeuh in zahtak uh hen la, leitung a teengte khempeuh in amah lamdang sakna tawh ding hen!

⁹ Bang hang hiam cih leh amah pau a, hong piang hi; thu pia a, hong om hi.

¹⁰ Topa in minamte’ thu ngaihsutna a mawkna suah a, mite’ geelna khaktan hi.

¹¹ Topa’ thu ngaihsutna kip ngitnget a, a lungsim ngaihsutna khang tawntungin kip hi.

¹² Topa pen Pasian-a a nei minam, ama luah dingin teelna a ngah minam in thupha ngah ahi hi.

¹³ Topa in vantung panin hong ensuk a, mi’tapate khempeuh a mu hi;

¹⁴ a tutna mun panin amah hong dakkhia-in, leitung mi khempeuh a en hi;

¹⁵ amau lungsim khempeuh a bawlpa in, amau gamtatna khempeuh en gige hi.

¹⁶ A galkap tampi in kumpi khat suakta sak zo lo a, galkap hangpa ama hatna tawh kihonkhia zo lo hi.

¹⁷ Sakol galkap in gualzawh nadingin a mawkna lametna hi a, ama hatna tawh hon zo lo hi.

^18-19 Amah a zahtakte, a itnakip sungah lametna a neite, sihna panin honkhia-in, kialpi hun sungin amaute a hin’ kep theih nadingin Topa’ mit amaute tungah om tawntung hi.

²⁰ Topa i ngak hi; amah in eimah huhpa leh i lum ahi hi.

²¹ Hi hi, ama min siangtho muang i hih manin ama sungah i lungdam hi.

²² Topa aw, nang kong lamet uh mah bangin na itna kip ko tungah hong omsak in.