Late 32 - Tedim Bible

Mawh maisakna hanga Thupha

¹ Ama khialhna kimaisak a, ama mawhna a kituamcipsak pa in thupha ngah mi ahi hi.

² Topa in mawhna a khuksak loh mi, a lungsim-ah khemna a om lo mi in thupha ngah ahi hi.

³ Ka mawhna ka pulak loh ciangin, sunthapai-a ka tautauna hangin ka pumpi a tha neem hi.

⁴ Sun leh zan tawntung ka tungah na khut gik hi; khuakhal nisa bangin ka thahatna a keu hi.

⁵ Ka khialhna na tungah kong pulak a, ka mawhna ka im kei hi; “Ka khialhnate Topa tungah ka pulak ding hi,” ka ci hi; tua ciangin ka mawhna nin nong maisak hi.

⁶ Tua ahih ciangin nangmah hong kimuh theih lai-in mi hoih khempeuh, nangma tungah thu kingensak in; tua hi leh tuikhang in amaute ban lo ding hi.

⁷ Nangmah in keima adingin bukna mun na hi a, haksatna panin kei hong kemin, hotkhiatna tawh nong tuam hi.

⁸ Na paina ding lampi lakin kong hilh ding a, ka mit tawh hong enin thu kong hilh ding hi.

⁹ Kamkaih tawh uk loh-a phamawh, thu theihna nei lo, sakol leh laa bang kei in.

¹⁰ Migilote in gimna tampi thuak uh a, Topa a muangte ahih leh itna kip in tuamcip hi.

¹¹ Thumante aw, Topa sungah lungdamin kipak un, lungsim man mi khempeuh aw, lungdamin awng un!