Late 29 - Tedim Bible

Huihpi sungah Topa’ Aw-ging

¹ Topa aa ci un, van mite aw, minthan’na leh hatna Topa aa ci un.

² Ama minthan’na Topa’ tungah pia un la, a siangtho kizepna tawh Topa bia un.

³ Topa’ aw in tuite tungah om hi; a minthang Pasian ging damdam a, tui tampite tungah Topa om hi.

⁴ Topa’ aw vanglian a, Topa’ aw in liatna tawh kidim hi.

⁵ Topa’ aw in taamtaak singte kitansak a, Topa in Lebanon mual taamtaak singte kuaitan hi.

⁶ Lebanon mual leh Sirion mualte bawngno leh gamsialno bangin amah in diangsak hi.

⁷ Topa’ aw in meikuang taangkhia sak hi.

⁸ Topa’ aw in gamlak lok a, Topa in Kadesh gamlak lok hi.

⁹ Topa’ aw in singkungte kiheekgawp sak a, gammang tulak hawkkhia-in kolhsak hi; a biakinn sungah a vekpi un awng-in “Minthan’na” ci uh hi.

¹⁰ Tuicin tungah Topa tu hi; a tawntung kumpi hihna tawh Topa tu hi.

¹¹ Topa in a mite hatna pia ta hen! Topa in a mite nopna thupha pia ta hen!