Late 28 - Tedim Bible

Thukkik ding Ngetna

¹ Topa aw, awng-in nang kong sam hi; ka suangpi aw, ka tungah bengngong kei in, tua ci-in kei tungah hong dai dide lecin, Leihawm sunga paisukte tawh a kibang ka suak hi.

² Siangthopen mun lamah ka khutte laamto a, nang kiangah huhna kong nget mah bangin, kong thumna aw hong za in.

³ Amau lungsim sungah siatna om hi napi a vengte tawh kilemna thu a gen khem, siatna bawlte, migilote tawh kei hong lakhia khawm kei in.

⁴ Amau sepna leh amau gamtat siatnate bangin amaute thukkik in; amau khut sepna tawh kizui-in thuk in la, amau ngah dinga kilawm thaman pia in.

⁵ Amaute in Topa’ nasepna, a khutte’ nasepna thupi ngaihsut lo ahih manin, amah in amaute susia-in a bawlkik nawn kei ding hi.

⁶ Ka thuumna aw hong za ahih manin Topa in thupha ngah ta hen!

⁷ Topa in ka hatna leh ka lum hi a, ka lungsim in amah muang hi; tua ahih manin kei hong kihuh a, ka lungsim nuamin diang a, ka lasakna tawh ama tungah lungdamna ka pia hi.

⁸ Topa in ama mite’ thahatna hi a, amah in a sathau nilhpa’ kihotkhiatna buk ahi hi.

⁹ Na mite hon in la, na luahte thupha pia in; amau cingpa hi in la, a tawntungin amaute huh in.