Late 26 - Tedim Bible

Hoih Gamtatna Lahkhiat ding Kalhna

¹ Topa aw, a hoih-in gamta-in, lungka loin Topa muang ka hih manin, ka thutan’na hong lak in.

² Topa aw, keimah hong ze-et in la hong sin in; ka lungsim leh ka ngaihsutna hong entel in.

³ Bang hang hiam cih leh na itna kip ka mai-ah om a, na tungah citakin ka gamta hi.

⁴ Mikhialte tawh tukhawm loin, thusim neite tawh ka kipawl kei hi;

⁵ siatna bawl mihonte ka mudah a, migilote tawh ka tukhawm kei ding hi.

⁶ Topa aw, mawh baan’lohna ka lahna-in ka khutte ka sil a, biakna pia-in na biakna tau kim-ah ka pai hi;

⁷ lungdam kohna la a gingin sa-in, nangma nasepna lamdangte ka gen kawm hi.

⁸ Topa aw, nangma inn-a teen’ ding leh na minthang a omna mun-ah om ding ka ut hi.

^9-10 Mimawhte, mi that nuam mite, a khut sungah siatna bawlna a neite leh a khut taklam uh golhguk tawh a kidimte tawh keimah hong susia khawm kei in.

¹¹ Ahih hangin kei ahih leh, ka hoih gamtat hi; hong tankhia in la kei hong hehpih in.

¹² Leizang mun-ah ka ding hi; mihon tampi sungah Topa ka phat ding hi.