Late 25 - Tedim Bible

Hut Nading leh Mawh Maisak Nading Ngetna

¹ Topa aw, nangma tungah ka lungsim kong laamto hi.

² Ka Pasian aw, nang kong muang hi, hong zahhuaisak kei in; ka galte ka tungah gualzo-in lungdam sak kei in.

³ Hi hi, nang hong ngakte kuamah zahhuaisak kei in; thu khual lo-a zuau theite zahhuaisak in.

⁴ Topa aw, na zia na tong thei-in hong bawl in la, na lampite hong hilh in.

⁵ Na thuman sungah kei hong paipih in la hong hilh in, bang hang hiam cih leh nangmah in ka kihotkhiatna Pasian na hi hi; sunthapai-in nang kong ngak hi.

⁶ Topa aw, taang pek-a kipan a omsa ahih manin, na hehpihna leh na itna kip phawkkik in.

⁷ Topa aw, ka khangno lai-a ka mawhna leh ka khialhnate ciamteh kei in la, na hoihna na ngaihsutna leh na itna kip tawh kizui-in kei hong phawk in!

⁸ Topa hoihin thutang hi; tua ahih manin mimawhte lam hilh hi.

⁹ Amah in lungsim kiniamkhiat mite a man-ah paipih-in a zia a tong hilh hi.

¹⁰ Ama thuciamna leh a thu a kipsakna a zuite’ adingin Topa’ lampite in itna kip leh cihtakna hi.

¹¹ Topa aw, ka mawhna lian ahih manin, nangma min hangin keima mawhna hong maisak in.

¹² Topa a zahtak mi kua ahi hiam? A lampi zuih ding Pasian’ hilhna a ngah mipa ahi hi.

¹³ Amah nuamsa tawntung ding a, a tate in leitang nei ding uh hi.

¹⁴ Topa tawh kilawmtatna in amah a zahtakte’ ading hi a, a thuciamna amau tungah kitheithang sak hi.

¹⁵ Ka mitte in Topa’ lamen tawntung hi, bang hang hiam cih leh amah in ngenthang panin ka khete sutkhia ding hi.

¹⁶ Keima lamah nang hong kihei in la hong hehpih in; bang hang hiam cih leh kei guak hi-in gimna ka thuak hi.

¹⁷ Ka lungsim natnate hong damsak in la, ka gimnate panin hong paikhiatpih in.

¹⁸ Ka gimna leh ka thuaknate ngaihsun in la, ka mawhna khempeuh hong maisak in.

¹⁹ Ka galte bangzah takin a tamna, leh keimah hong mudah luatnate ngaihsun in.

²⁰ Kei hong cing in la, hong honkhia in; nangmah hong bel ka hih manin kei hong maizumsak kei in.

²¹ Nang hong ngak ka hih manin, kicin’na leh thutan’na in kei hong kem ta hen.

²² Pasian aw, ama haksatna khempeuh panin Israelte honkhia ta in.