Late 21 - Tedim Bible

Gualzawh manin Lungdam Kohna

¹ Topa aw, nangma thahatna sungah kumpipa lungdam a, gawlzawhna na piakna sungah amah naknuam mahmah hi.

² Ama lungsim’ deihna nang in na piakhin a, ama hong ngetna na khaktan kei hi.

³ Bang hang hiam cih leh thupha hoihte tawh amah na dawntuah a, ama lu tungah kham siang lukhu na khusak hi.

⁴ Nangma tung panin amah in nuntakna hong ngen a, ama tungah sau veipi nuntakna na pia hi.

⁵ Nangma huhna hangin ama minthan’na lian a, hoihna leh minliatna ama tungah na pia hi.

⁶ Hi hi, nangmah in a tawntungin thupha ngah pen dingin amah na bawl a, nangma ompihna lungdamna tawh amah na kipaksak hi.

⁷ Bang hang hiam cih leh kumpipa in Topa muang a, Sangpen Pa’ itna kip hangin amah a kiling kei ding hi.

⁸ Na khut in na galte khempeuh su ding a, na khut taklam in nang hong mudahte sugawp ding hi.

⁹ Na kilat ciangin meiphual kuang bangin amaute na bawl ding hi. Topa in hehna tawh amaute nawmvalh ding a, mei in amaute kangtum ding hi.

¹⁰ Leitung panin a suan a khakte, mi’ tate lak panin amau’ tate na susia ding hi.

¹¹ Na langah siat nading vaihawm a, gitlohna a bawl uh leh, tangtung lo ding uh hi.

¹² Bang hang hiam cih leh amaute na taisak ding hi; na thalte tawh a maitang uh na ngim ding hi.

¹³ Topa aw, na hatna hangin nang hong kipahtawi ta hen! Nangma vangliatna la sa-in kong phat ding uh hi.