Late 2 - Tedim Bible

Topa’ sathau nilhpa’ukna

¹ Bang thu hangin minamte in siat nading ah kithukhat sim a, mite in a mawk nading sawmsim uh hiam?

² Leitung kumpite leh gam ukte in, Topa leh ama sathau nilhpa langpangin vaihawm uh a,

³ “Amau’ hong hennate su-tat khia-in, amau khaute ei kiang panin paikhia ni,” ci uh hi.

⁴ Vantunga tu-pa in nuihsan a, tua Topa in amaute zahko hi.

⁵ Tua ciangin hehna tawh amau kiangah thu gen ding a, heh luatna tawh amaute linglawng sakin,

⁶ “Ka mual siangtho Zion tungah ka Kumpi ka tusak khin hi,” ci hi.

⁷ Topa’ thukhenna kong gen ding hi; Amah in kei’ tungah, “Nang in ka tapa na hi a, tuni in nang kong piang sak khin zo hi.

⁸ Keima tungah hong ngen in; nangma luah dingin minamte ka bawl ding a, leimong dongin nangma neihsa ka hisak ding hi.

⁹ Siktawn khat tawh amaute na satkham ding a, beelseekpa’ beel den’khap bangin amaute lei-ah na dengzan ding hi,” hong ci hi.

¹⁰ Tua ahih ciangin kumpite aw, tu-in pil un; leitung gam ukte aw, thu phawk un.

^11-12 Launa tawh Topa’ na sem un la, liin’na tawh lungdamin, a khe nam un; tua hi kei leh amah sinso-in, lam kal-ah na sia-mang ding uh hi; bang hang hiam cih leh ama hehna kitawhkuang pak hi. Amah a bel khempeuh mi nuamsate ahi hi.