Late 18 - Tedim Bible

Hotkhiatna hangin Topa Kiphat

¹ Ka thahatna ahi Topa aw, nang kong it hi.

² Topa in ka suangpi, ka munkip muanhuai, hong honkhia-pa, ka Pasian, ka suangpi, ka belhpa, ka lum, ka kihotkhiatna ki, ka munkip ahi hi.

³ A phat taak Topa ka sam a, ka galte kiang panin ka suakta hi.

⁴ Sihna khaute in hong gakcip a, siatna tuihualte in hong nawk hi.

⁵ Leinuai sihna khaute in hong kancip a, sihna thangte in kei hong dawntuah hi.

⁶ Ka gimna-ah Topa ka sam a, ka Pasian’ tungah huhna ngenin ka kiko hi. Amah in a biakinn panin ka aw hong za a, amah ka kohna aw in a bilte va ban hi.

⁷ Ama hehna hangin leitung kipumpei in, kiveei a, mual bulpite zong lingin kising damdam hi.

⁸ Ama nakvangte panin meikhu pusuak a, a kam panin mei husia pusuak hi; ama tung panin mei-am san kuangkhia hi.

⁹ Amah in vanpi niamsak-in hong kumsuk a, ama khe nuai-ah meivom sahpi om hi.

¹⁰ Amah in Kherub khat tungah tuangin hong leeng a, huih khate tungah manlang takin hong leeng hi.

¹¹ A kimkot-a ama ki-um nadingin khuamial bawl a, a tung kikhuh nadingin meii sahpi leh tui tawh ziingsak hi.

¹² Ama mai-a khuavak panin gialpi leh mei-amte in ama meii sahpite phulet hi.

¹³ Topa zong vantungah awng a, Sangpen Pa in gialpi leh mei-amte ahi ama aw hong gingsak hi.

¹⁴ Amah in a thaltangte lawn a, amaute kithehthang sak hi; khuaphialep phiasak a, amaute susia hi.

¹⁵ Topa aw, nangma mawhsakna, na nakging tawh tuipi taw kimu a, leibulpite a guakin om hi.

¹⁶ Amah in a sang panin a khut tawh zam-in hong la a, tui thukpi panin keimah hong kaikhia hi.

¹⁷ Ka gal hatpa kiang pan leh hong mudahte kiang panin amah in keimah hong honkhia hi; bang hang hiam cih leh amaute kei’ adingin hat lua hi.

¹⁸ Amaute in ka kamsiat ni-in kei hong neh uh hangin Topa in kei hong huhpa ahi hi.

¹⁹ Amah in mun tanzau khatah kei hong paikhiatpih a, kei tungah lungkim ahih manin hong honkhia hi.

²⁰ Topa in ka thumanna tawh kizui-in keimah noptuamna hong pia a, ka khut siangthona tawh kizui-in hong dinkik hi.

²¹ Bang hang hiam cih leh Topa’ lampite ka tawn khin a, ka Pasian kiang panin gitlohna tawh ka paikhia kei hi.

²² Bang hang hiam cih leh ama biakna ngeina kipte khempeuh ka mai-ah om a, a thukhamte ka paikhia kei hi.

²³ Ama mai-ah kawkbang loin, kisuan’ nadingte panin ka kikem hi.

²⁴ Tua ahih ciangin Topa in ka thumanna leh ama muhna-ah ka siangthona tawh kizui-in hong dinkik khin hi.

²⁵ Thuman mi tungah nangmah na thuman a, kawkbang lo mi tungah na diktat hi.

²⁶ A siangtho mi tungah na siangtho gamtat a, thukawi mite na galbawl hi.

²⁷ Bang hang hiam cih leh nangmah in miniamte na honkhia a, ahih hangin mi kiphasakte na niamsak hi.

²⁸ Hi hi, nangmah in keima mei na vaak a, Topa ka Pasian in ka khuamial na vaaksak hi.

²⁹ Hi hi, nangma hangin galkap honkhat ka sugawp thei a, ka Pasian hangin khuakulh khat ka kan thei hi.

³⁰ Hih Pasian a thu kicing a, Topa’ kamciamna a manna kilang hi; amah a belte khempeuh adingin amah in kidalna lum ahi hi.

³¹ Topa longal, Pasian kua hiam? Pasian longal, suangpi kua hiam?

³² keimah thahatna hong guan, Pasian, ka lampi lungmuan’ nadinga a bawlpa ahi hi.

³³ Amah in sangaipi’ khe bangin keima khe bawl a, mun sangna-ah keimah hong koih hi.

³⁴ Galsim siam nadingin ka khutte hong hilh a, ka khut in sumngo thal nangawn a keek zo hi.

³⁵ Na hotkhiatna lum hong pia khinin, na taklam khut in hong phong a, na huhna in kei hong liansak hi.

³⁶ Ka kalsuan nading mun tanzau nong pia a, ka khe taal lo hi.

³⁷ Ka galte delhin ka pha a, a vekpi-un a kisiat khit matengin ka ciahkik kei hi.

³⁸ Amaute a thawhkik zawh loh nadingun ka sunlet a, ka khe nuai-ah puk uh hi.

³⁹ Bang hang hiam cih leh galdo nadingin keimah tha nong guan a, keimah hong dote ka nuai-ah na nenniam hi.

⁴⁰ Ka galte nangmah in na nungkik sak a, kei hong mudahte ka susia hi.

⁴¹ Huh ding ngenin amaute kiko uh a, ahih hangin a hon ding kuamah om lo hi; amaute in Topa tungah ko uh a, ahih hangin amah in dawng lo hi.

⁴² Huihpi mai-ah leivui bangin amaute ka satvui a, kongzing buante bangin amaute ka lawnkhia hi.

⁴³ Mite tawh kidona panin nangmah in kei nong honkhia a, minamte’ lutang-in kei nong bawl a, ka theih ngei loh mite in keima na hong sem uh hi.

⁴⁴ Ka thu a zak phetun amaute in hong mang uh a, gamdang mite in kei hong mai-et uh hi.

⁴⁵ Gamdang mite lungkia a, a phualkip panun a liing sa-in hong paikhia uh hi.

⁴⁶ Topa hing hi; ka suangpi in thupha ngah hen la, ka kihotkhiatna Pasian,

⁴⁷ hong thuhkik sakin ka nuai-ah mite hong zawhsak Pasian,

⁴⁸ ka galte kiang panin keimah hong honkhiapa lian ta hen. Hi hi, ka langte tungah kei hong liansak a, mi ngongtatte kiang panin nong honkhia hi.

⁴⁹ Topa aw, hih thu hangin minam dangte lakah nang kong phat ding a, na min phatna la ka sa ding hi.

⁵⁰ Zawhna lianpi ama kumpipa tungah pia a, a sathau nilhpa David leh a suan a khakte tungah tawntungin itna kip a lak hi.