Late 17 - Tedim Bible

Amah a Bawlsiate’ kiang panin Hotkhiat Nading Thuman mipa’ Ngetna

¹ Topa aw, thuman kong ngetna hong za in la, ka otna aw hong ngai in! Zuau baang lo muk pana ka thugetna hong ngai in!

² Ka tan’na nangma kiang panin hong kilangsak ta in! Na mitte thuman musak ta in!

³ Keima lungsim hong sin in la, zan-in nangmah ka kiangah hong hawh in la, keimah hong ze-et lecin, ka sungah gitlohna na mu kei ding hi; ka kam in khial lo hi.

⁴ Mite’ gamtatna tawh kisai-in ci leng, nangma muk pan-a hong pai thu tawh mi ngongtatte’ lampi ka pelh kim hi.

⁵ Ka kalsuannate in nangma lampi-ah kip khin a, ka khe taal lo hi.

⁶ Pasian aw, hong dawng ding na hih manin nang kong sam hi; na bil hong ngat in la ka thu hong za in.

⁷ Amau’ langpangte’ kiang panin na taklam khut hong belte’ Honpa aw, na itna kip lamdang takin hong lak in.

^8-9 Kei hong sutgawp migilo, keimah hong umcih ka gal kihtak huaite kiang panin mitnauta bangin hong kem in la, na kha lim-ah hong seel in.

¹⁰ Amaute in hehpihna lungsim nei lo uh a, a kam uh tawh amaute kiphatsak pau uh hi.

¹¹ Amaute in kei hong sulzuih uh a, tu-in amaute in kei hong umcihin, keimah leilak den’ nadingin hong en uh hi.

¹² Amaute in a balnen nuam humpinelkai tawh kibang uh a, humpinelkai khanglai sa-pang tawh kibang uh hi.

^13-14 Topa aw, tho in! Amaute maiphut in la, thalpaih in! Topa aw, a deih khempeuh uh hih leitungah a nei migilote kiang panin nangma khut leh na namsau tawh kei hong honkhia in. Amau’ adingin na koihcing danpiaknate thuaksak in la, a tate un zong a cing valin thuak uh hen la, a naungekte’ adingin nusiat lai ta uh hen.

¹⁵ Kei ka hih leh, thumanna tawh na maitang ka en ding a, ka khanlawh ciangin, nangma mel muhna tawh ka lungkim ding hi.