Late 149 - Tedim Bible

Israel in Topa Phat Hen

¹ Topa phat un! Topa’ tungah la thak sa un, a thuman mite’ kikhopna sungah amah phatna sa un!

² Amah a Bawlpa’ tungah Israel lungdam hen la, amau Kumpipa’ sungah Zion mite kipak ta hen!

³ Laamna tawh ama min phat un la, khuang leh laiza lasakna tawh ama tungah langaih sa un!

⁴ Bang hang hiam cih leh ama mite tungah Topa lungdam a, miniamte gualzo sakin a pahtawi hi.

⁵ A gualzawhna uh-ah thuman mite lungdamin diang uh hen la, ama mai-ah khukdin-in, nuamna la sa uh hen.

^6-9 Minamte tungah phu la-in mihingte daan pia ding, amau kumpite sikkhau tawh henin amau miliante sikkol bulh ding, a kigelhsa thukhenna bangin amaute tungah a semkhia dingin, lang nih-a hiam namsau a tawikawmin, Pasian phat-in awng ta uh hen! Hih in ama misiangthote’ minthan’na ahi hi. Topa phat un!