Late 146 - Tedim Bible

Pasian pen’ Mite a Huh, a Lianpa hi

¹ Topa phat un! Ke’n, Topa ka phat ding hi.

² Ka hin’ lai teng Topa ka phat ding hi; ka nuntak lai teng ka Pasian tungah phatnate ka sa ding hi.

³ Huhna hong pia thei lo uliante ahi a, mihing’ tapa ahi zongin muang kei un.

⁴ A husan’na a bei ciangin amah lei-ah ciahkik a, tua ni mahin ama ngaihsutnate bei ta hi.

⁵ Jakob’ Pasian pen ama huhpa hi-in, ama Topa Pasian, a muangpa in mi lungdam ahi hi.

⁶ Amah in van leh lei, tuipi leh tuate sunga omte khempeuh bawl a, a tawntungin thuman hi;

⁷ a kinengniam mite’ adingin thumanna semkhia a, gilkialte an a vaak hi. Topa in thongkiate khahkhia hi;

⁸ Topa in mittawte, khua musak hi. Topa in, niamsakna a thuak mite sangto sak a, Topa in thuman mite a it hi.

⁹ Topa in peemtate kem a, meigong numei leh pa nei lote a huh hi; ahih hangin amah in migilote’ vaihawmna suksiatsak hi.

¹⁰ Zion aw, nangma Pasian Topa in khang tawntungin uk ding hi. Topa phat un!