Late 144 - Tedim Bible

Hotkhiat ding Ngetna A Lungdam Mite’ Thu a Kigenna

¹ Ka khutte galdo nading, ka khutmete galkap nadinga a hilh, kei hong hu, Topa in thupha ngah ta hen;

² amah in ka suangpi leh ka munkip muan’huai, ka kulhpi leh hong honkhiapa, ka lum leh ka belhpa, ka nuai-ah mite a zopa ahi hi.

³ Topa aw, nangmah in na phawktham dingin, mi in bang hi a, nangmah in na ngaihsut tham dingin mihing’ tapa in bang ahi hiam?

⁴ Mi pen husan’ khat tawh kibang a, ama nite in a tai dandan nilim tawh kibang hi.

⁵ Topa aw, na vanpite niamsak in la hong paisuk in! Mualte lawng in la meikhu suak sak in!

⁶ Khuaphialep phiasak in la, amaute kithehthang sak in, na thaltangte lawn in la amaute susia in!

⁷ A sangna mun panin na khut hong zan in la, tuilian lauhuaite, leh gamdang mite’ vangliatna panin hong honkhia in.

⁸ A kam uh tawh zuauthu a gente leh kiciamna a bawl khit ciang nangawnin a zuau vevete’ kiang panin kei hong phelin hong honkhia in.

⁹ Pasian aw, la thak khat kong sak ding hi; harp zang sawm khausai lasakna nang kong tum ding hi.

¹⁰ Kumpite tungah gualzawhna a piapa, na nasempa David a honkhiapa na hi hi.

¹¹ A gilo galte kiang panin kei hong hon in la, a kam uh tawh zuauthu a gen, kiciamna a bawl khit ciang nangawn-in a zuau veve gamdang mite’ khut sung panin kei hong honkhia in.

¹² Ka tapate uh a tangval lai-in a khangcing kungte bang ta hen la, ka tanute uh kumpi inn lam nadinga kisui innkiu khuampite bang ta hen;

¹³ ka saalte uh dimin an nam khempeuh om ta hen la, ka tuute uh a tultul a thenthenin gamlakah suak ta hen;

¹⁴ ka bawngte uh pung hen la a tolh om kei ta hen; ka kongzingte uh ah cimawh-a kikona om kei ta hen!

¹⁵ Tua bang thupha ngah mi in mi lungdam ahi hi! Topa pen amau’ Pasian ahi mite pen mi lungdam ahi hi.