Late 142 - Tedim Bible

Bawlsiatna panin Hotkhiat ding Ngetna

¹ Topa’ hong huh ding ngenin ka kiko a, Topa tungah ka thuum hi.

² Ama mai-ah ka lungkim lohna ka sung a, ama mai-ah ka haksatna ka gen hi.

³ Ka cih nading ka theih nawn loh ciangin, amah in ka mailam ding hong theihsak hi. Ka paina lampi-ah ka galte in tehlop khat tawh kei hong siahsim uh hi.

⁴ Ka kiim ka pam enin ka khuadak a, ahih hangin kei hong huh ding kuamah om lo hi; ka belh ding kuamah om lo a, kuamah in kei hong don lo hi.

⁵ Topa aw, nang tungah kong kiko hi; nang in keima belh na hi a, a hingte’ leitangah keima tanh na hi hi, kong ci hi.

⁶ Ka kikona hong ngai in; bang hang hiam cih leh kei hong kiniamkoih mahmah hi! Kei hong bawlsiate’ kiang panin hong honkhia in; bang hang hiam cih leh kei’ adingin amaute hatlua uh hi!

⁷ Thong sung panin kei hong lakhia in! Tua ciangin nangma mite tawh na min kong phat khawm ding uh hi; bang hang hiam cih leh nang in itna lianpi tawh kei tungah nong gamta hi.