Late 138 - Tedim Bible

Pasian’ Maipha Hangin Phatna

¹ Topa aw, ka lungsim khempeuh tawh nang tungah lungdamna kong ko a, pasiante’ mai-ah nangmah phatna ka sa hi;

² nangma biakinn siangtho lamah ka kun a, na itna kip leh na thumanna hangin na min kong phat hi; bang hang hiam cih leh na khempeuh sangin na min leh na thu a liat zawkna na lak hi.

³ Nang kong sap ciangin kei nong dawng a, na thahatna tawh kei nong thakhauhsak hi.

⁴ Topa aw, leitung kumpi khempeuh in na thuciamnate za khin uh ahih manin nang hong phat ding uh hi.

⁵ Topa’ minthan’na lian ahih manin amaute in Topa’ nasepna ziate la-in sa ding uh hi.

⁶ Bang hang hiam cih leh Topa lian napi-in amah in a neute don hi; ahih hangin a kiphasakte ahih leh amah in gamlapi panin mu thei hi.

⁷ Haksatna tuamtuamte ka thuak ciangin kei nong kem hi; a heh ka galte, kei’ tangin nong dosak a, na thahatna tawh kei nong honkhia hi.

⁸ Topa in kei adinga a ngaihsutna tung sak ding hi; Topa aw, na itna kip kho tawntung hi. Na sepsa na maban hong tun in.