Late 137 - Tedim Bible

Babilon-ah Sal-a Om Manin Gimna

¹ Zion khuapi i ngaihsut khak ciangin Babilon luite gei-ah eite tusukin i kapkap hi.

² Tua lai-a gialhek kungte tungah i laiza lasaknate i khai hi.

³ Bang hang hiam cih leh ei hong man mite in la i sak ding hong deih a, ei hong bawlsiate in i gualnop ding hong deihin, “Zion late khat hong sak un!” hong ci uh hi.

⁴ Topa’ la, gamdang ah bangci sak thei ding i hi hiam?

⁵ Jerusalem khuapi aw, nang kong mangngilh taak leh ka taklam khut bui ta hen!

⁶ Nang kong phawk kei a, kei’ lungdamna a lianpen sangin Jerusalem a sangzaw in kong koih kei taak leh ka dang tawngah ka leii toncip ta hen!

⁷ Topa aw, Jerusalem a siat ni-a Edom mite in, “Sumai un, sumai un! A bulpi dongin sumai un!” a cih vialna uh phawk in.

⁸ Mi a susia, Babilon aw, kote tunga nong bawl bangin nang tungah hong thukpa in lungdamna ngah ta hen!

⁹ Na taneute hong laksakin suangtumpi den’na-a hong neihsakpa in lungdamna ngah ta hen!