Late 127 - Tedim Bible

Pasian, Hauhna Hong Piapa

¹ Topa in inn lam kei leh, a lam mite’ nasepna in a mawkna ahi hi. Topa in khuapi hu kei leh, khuapi cingte’ cin’na in a mawkna ahi hi.

² Zingsangin tho baih-in, gimpi-a nangma’ sepsa an na nek hakna in a mawkna ahi hi; bang hang hiam cih leh amah in ama itte tungah a ihmut sung nangawnun a pia hi.

³ En un, tapate pen Topa’ tung pan-a letsong hi a, tate pen ama hong piak thupha ahi hi.

⁴ Mi khat in a khangno lai-in a neih tapate pen galhangpa’ khut sunga om thaltangte tawh kibang hi.

⁵ A thallawng dimin tua bang thaltang a neipa in mi lungdam ahi hi. Amah guallel-in zahhuai ngeilo ding hi.