Late 121 - Tedim Bible

Topa pen, Ama Mite a Kempa

¹ Keimah in mual tung lam ka ento hi. Keimah huhna koi lai pan hong pai ding ahi hiam?

² Van leh lei a bawl Topa kiang panin keima huhna hong pai hi.

³ Amah in ka khe taalsak lo ding a, kei hong kempa lusu lo ding hi.

⁴ En un, Israel a kempa pen lusu lo a, zong ihmu lo hi.

⁵ Topa in nangmah hong cing ding a, nangmah hong hu dingin na kiangah hong om hi.

⁶ Sun-in ni in nang hong gimsak lo ding a, zan-in kha in nang hong sukha lo ding hi.

⁷ Topa in, siatna khempeuh panin nang hong hu ding a, amah in a muanhuai-in nang hong kem ding hi.

⁸ Topa in, tu-a kipan a tawntungin na pusuahna na sungtumna-ah nang hong kem ding hi.