Late 12 - Tedim Bible

Mi kheem theite Kiang panin Pasian’ Huh ding Ngetna

¹ Topa aw, hong huh in, bang hang hiam cih leh mihing’ tate lak panin mi thumante mangthang a, mipha khat beek om nawn lo hi.

² Mi kim in a vengte kiangah zuau thu gen ciat a, phat khemna kamzol leh lungsim nam nih tawh pau uh hi.

^3-4 “I leii tawh gual zo ding i mukte eima neihsa; i to kua hiam?” a ci vial, kiphatsakna a piangsak leii, phat khemna muk khempeuh, Topa in atkhia ta hen.

⁵ Topa in, “Mizawng mi a neihsa kihawkkhia a, mi cimawh mi thuum ahih ciangin, tu’n ding-in, ama lunggulh lungmuan’na munah amah ka koih ding hi,” ci hi.

⁶ Topa’ thuciamnate in a siangtho thuciamna hi a, meikhuk sunga sagih vei a kisiangsak ngun tawh kibang hi.

⁷ Topa aw, kote hong dal in la, tu khang mite kiang panin hong kem in.

⁸ Mihing’ tate lakah siatna a kipahtawi ciangin mun khempeuhah migilote vak kawikawi hi.