Late 113 - Tedim Bible

A Sangna-a Om Pasian in Miniamte Sangsak

¹ Topa phat un! Topa’ nasemte aw, phat un, Topa’ min phat un!

² Topa’ min in tu-a kipanin a tawntungin thupha ngah ta hen!

³ Nisuahna pan nitumna dongin Topa’ min phat ding ahi hi!

⁴ Topa in minam khempeuhte tungah uk a, ama minthan’na in vantung sangin sang zaw hi.

^5-6 A sangna mun-a a tu, vantung leh leitung a hong ensuk Topa, eite’ Pasian pen kua tawh kibang ahi hiam?

⁷ Amah in leivui panin mizawngte lamto-in, ninphual panin mi cimawhte leh a lungkhamte domto a,

⁸ uliante tawh kikhawlsak a, ama mite ulian-in a bawl hi.

⁹ Amah in tasel numei inn guan a, ta a nei nu lungdamin a bawl hi. Topa phat un!