Late 112 - Tedim Bible

Miphate’ Lungdamna

¹ Topa phat un. Topa zahtak-in ama thupiaknate nuam a sa mahmah mi in thupha ngahpa ahi hi!

² Ama suan-le-khakte in leitungah vanglian ding a, lungsim thutang a nei mipa’ suan-le-khakte’ thupha kipia ding hi.

³ Hauhna leh nopsaknate ama inn sungah dim ding a, ama thumanna kip tawntung ding hi.

⁴ Lungsim thutangte’ adingin khuamial sung panin khuavak hong taangkhia hi; Topa dik a, hehpihna nei-in, thuman hi.

⁵ Cingh gamtatin mi tungah leitawi pia a, thutangin a gamta mipa tungah thu hoih hi.

⁶ Amah kiliing lo taktak ding a, amah kiphawk tawntung ding hi.

⁷ Amah in thusia zak ding lau lo hi; Topa muang a, ama lungsim a kip hi.

⁸ Amah lau lo, lunghimawh loin om hithiat a, amah a langpangte a guallelh ding lamtak theitel hi.

⁹ Amah in hawmkhia zuahzuah a, mizawngte tungah pia khin hi; ama migitna kip tawntung a, amah vanglianin, kipahtawi ding hi.

¹⁰ Migilo in hih thu mu-in a hehsuak a, a ha gawigawi-a tuimang hi; migilopa’ lametna in a mawkna suak ta hi.