Late 111 - Tedim Bible

Topa’ Liatna leh Hoihna

¹ Topa phat un, lungsim thutangte a omna, mihon kikhopna sungah ka lungsim khempeuh tawh Topa tungah lungdamna ka ko ding hi.

² Topa’ nasepnate lian a, hoih a sa mi khempeuh in tuate kankan uh hi.

³ Ama nasepna in pahtawina leh minliatna tawh kidim a, ama thumanna in kip tawntung hi.

⁴ Amah in phawk tawntung dingin a lamdang ama sepnate hong bawl a, Topa dikin hehpihna a nei hi.

⁵ Amah in amah zahtakte an pia a, ama thuciamna hong phawk tawntung hi.

⁶ Amah in ama mite tungah minamte’ gamh a piakna tawh ama vangliatna hong lak khin hi.

⁷ Ama nasepnate khempeuh ah amah thumanin citak a, ama thupiaknate muan’taak mahmah hi.

⁸ A tawntungin tuate kip ngitnget a, thuman leh thutang tawh zuih ding ahi hi.

⁹ Amah in a mite hong honkhia a, amah in a tawntunga dingin thupiakna a bawl khin hi. Ama min, siangtho-in kihtak-huai mahmah hi!

¹⁰ Topa zahtakna in pilna kipatna ahi hi; ama thupiak a zuite khempeuh tungah thukhen siamna a pia hi. Amah phat tawntung ding ahi hi.