Late 110 - Tedim Bible

Pasian in Kumpipa tungah Ukna Pia

¹ Topa in ka to kumpipa tungah, “Na galte nangma khe ngakna-in ka bawl matengin ka taklam khutah tu in,” a ci hi.

² Topa in Zion panin na kumpi ciangkhut hong puak hi. Na galte’ lakah uk in!

³ Na mihonte mual siangtho tungah na makaih ciangin, utna lungsim tawh na mite hong kipia ding uh hi. Daitui bangin zingsang ciangin na khangnona nangma tungah hong tung ding hi.

⁴ Topa in thuciam zo a, ama ngaihsutna kheel lo ding hi. “Melkhizedek bangin nang in a tawntungin siampi na hi hi,” a ci hi.

⁵ Topa in nangma taklam-ah om hi; ama heh ni-in amah in kumpite zogawp ding hi.

⁶ Kumpipa in minamte lakah thukhen ding a, tua munte misi luang tawh dimsak ding hi; amah in a zai mahmah leitungah ukpite susia ding hi.

⁷ Amah in lampi gei-a luitui dawnin thahat ding a, amah a gualzo-in om ding hi.